د ارشاد، حج او اوقافو وزارت مسؤلينو د دغه وزارت د تېر کال د لاسته راوړنو پروګرام کې ويلي، چې د سږ کال د حج مراسمو لپاره هر حاجي څخه ۲ لکه او ۸۲ زره او ۹۰ افغانۍ راټولې شوې وې، چې ټولیزه اندازه یې ۸ میلیارد او ۲۷۸ میلیونه او ۷۷۷ زره افغانۍ کیږي.
مسؤلين زياتوي، چې له یاد شمېر څخه ۱۱۵ میلیونه او ۴۶۴ زره او ۷۸۲ افغانۍ اضافه شوي، چې هر حاجي ته به ۳۹۳۶ افغانۍ بېرته ورکړل شي.
د معلوماتو له مخې حاجیان کولی شي، سر له سبا د پاسپورټ او تذکرې په لرلو سره د خپلو پیسو ترلاسه کولو لپاره دغه وزارت او یا د خپل ولایت د حج او اوقافو ریاست ته مراجعه وکړي.