حفیظ منصور له یوې رسنۍ سره د مرکې په پيل کې په خورا صراحت او افتخار سره، د شر او فساد ډلې او پاکستاني استخباراتو ترمنځ د شته اړيکو او طالبانو په ضد له نویو همکاریو څخه پرده پورته کړه او هم یې په مغرورانه توګه وويل، پاکستان اوس منلې چې د طالبانو خلاف له موږ سره مرسته وکړي، دا خبره د پاکستان د استخباراتي سازمان نوي مشر د تاجکستان له ولسمشر سره په وروستۍ لیدنه کې کړې ده.
منصور ته خپل تېر تاريخ هم ور ياد نه شو، چې تېرې څه باندې درې لسیزې خو همدا دوی په تبلیغاتو سره افغانانو او نړۍ ته په اذهانو کې ور پېچکاري کول، چې طالبان د پاکستان خلک دي او د هغوی لخوا یې حمایت کېږي. خو نن ورځ د تبلیغاتو عاملین د هماغه هېواد اجیران ثابت شول، چا ته چې یې نور منسوبول.
نوموړي د خپلو یادو څرګندونو په ترسره کولو سره د شر او فساد هغه پخه غلامي هم ومنل، چې لسیزې یې دوام درلود؛ ده د بغاوتګرو په سرنوشت د معاملې ماهیت ته حقيقت ور واغوسته او څرګنده یې کړه چې د دوی پرېکړې تاجکستان کوي او د دوی د سرنوشت او افغان وژنې لپاره یې تاجکستان، له آی ایس آی سره د معاملې کولو په حال کې دی.
منصور د مرکې په لړ کې ۲۰۲۴م کال د طالبانو خلاف له نظامي پلوه د جګړې او د بريدونو له ډېروالي سره د ځان په ګټه وباله، خو کله چې د خپرونې کوربه ورته وويل، د شخړو نړيوال د ثبت سازمانونه او نور نړيوال تحقيقات ترسره کوونکي د طالبانو خلاف د نظامي مبارزې په مورد لاسته رواړنې له صفر سره ضرب کوي، ده وويل، مونږ به په ۲۰۲۵م کال کې له یو تحولي کال سره مخ يو، ځکه پاکستان به له مونږ سره د طالبانو په نسکورولو کې مرسته وکړي.
د افغانستان د ازادۍ لپاره د خیالي جبهې جنګېدونکي حفیظ منصور وړاندې يوه تاريخي تېروتنه او د پاکستاني رژيم د ملاتړ جلبولو لپاره د ډيورنډ نا منل شوې کرښې په اړه بې باکه څرګندونې وکړې.
د نوموړي او پاکستاني رژيم د پخواني موقت لومړي وزير انورالحق کاکړ د خبرو ترمنځ هيڅ تفاوت نه و؛ کاکړ هم ډیورنډ فرضي کرښې ته نړيواله منل شوې پوله د دې لپاره ويلې، چې د پاکستاني رژيم په حکومتي چوکاټ کې خپله څوکۍ او حيثيت وساتي، خو حفيظ منصور بيا د افغانستان د شته امنيت د لمنځه وړلو، مرکزي حکومت د تضعیف او د پاکستاني رژيم د اویا کلنې هيلې او موخې پوره کولو او په نظامي ميدان کې د ماتې شوې جبهې لپاره د ملاتړ جلبولو په موخه داسې بې باکه او بې مسؤلیته څرګندونې وکړې.
منصور به په دې خبرو د پاکستاني رژيم د ملاتړ په جذب کې تر ډېره بريالی وي، خو ولس ته یې خپل اصليت له ورایه ښکاره کړ، چې دا خلک د قدرت ترلاسه کولو، قدرت جزیرو د بيا اعادې، له اداري فساده ډکې حکومتولۍ لپاره ډيورنډ فرضي کرښه پاکستان ته پرېښودلی شي، خو د هغه ولس زړونه او ملاتړ له لاسه ورکوي کوم چې دوی پرون پاکستان ته د طالبانو په منسوبولو حکومتولي کول.
ولس ته باید څرګنده وي چې اوس او په تېرو دوو لسيزو کې د طالبانو خلاف د شر او فساد ډلو ټول هغه ادعاوې دروغ او له حقيقت لرې را برسېره کېږي، په کومو چې دوی طالبان تورنول.
هغه جبهات او خوځښتونه به دې ولس ته کومه سوکالي او خوشحالۍ په ارمغان راوړي، چې د وژنې لپاره یې معاملې په اسلام اباد، دوشنبې او د نړۍ په نورو پلازمېنو کې ترسره کېږي!؟
په داسې حال کې چې د شر او فساد ډلې يوه لويشت خاوره لا هم په لاس کې نه لري، پاکستان ته د ډيورنډ فرضي کرښه د سرحد په توګه پېژني؛ که چيرته دا خلک د واک تر ګدۍ ورسېږي، د افغانستان پر سر به نوري څه – څه معاملې ونکړي!؟
تاجکستان ته د پاکستاني استخباراتو د مشر سفر او د شر او فساد ډلې د رهبرۍ شورا د غړي حفیظ منصور هيلې دا هم تبارز کوي، چې دا ډله په حقيقت کې له نورې ټولې نړۍ او هېوادونو د طالبانو په خلاف د مقاومت لپاره د مرستې په مورد کې ناهيلي شوي دي او د بې وسۍ او ناوتوانۍ په دې حالت کې دوی د افغانستان د تجزیې پر سر تيار دي چې له پاکستان څخه مرسته وغواړي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.