د خیبر پښتونخوا ایالتي حکومت وايي، د اسناد لرونکو افغان کډوالو جبري ایستل به له افغانستان سره اړیکې لا ترینگلې کړي.
د پښتونخوا د ایالتي حکومت ویاند محمد علي سیف وايي، د د خیبر پښتونخوا ایالتي حکومت له امنیتي ادارو غوښتي چې اسناد لرونکي افغان کډوالو سره باید ناوړه چلند ونه شي او نه هم په زور وویستل شي.
سیف له یوې پاکستانۍ رسنۍ سره په مرکه کې ویلي، په لومړي پړاو کې د دوی دنده دا وه چې بې اسنادو افغان کډوال وپېژني او له دې ایالت څخه یې وباسي.
نوموړي، د خیبر پښتونخوا له ایالت څخه هغه افغان کډوال ایستل شوي، چې د استوگنې قانوني اسناد یې نه لرل، خو د قانوني اسناد لرونکو افغان کډوالو له ایستلو سره مخالف دي.
د ملگرو ملتونو د کډوالو ادارې د معلوماتو له مخې، اوسمهال په پاکستان کې ۲.۱۸ مېلیونه افغان د کډوالۍ قانوني اسناد لري، ۱.۳ مېلیونه د پي او ار کارتونه لري او تر ۸ سوه زرو پورې د لنډمهاله اوسېدو کارتونه لري.
پاکستان د ۲۰۲۳ کال په نومبر میاشت کې د افغان کډوالو په زور ایستلو لړۍ پیل کړې، چې د پرو سږکال راهیسې له پینځه نیم سوه زرو ډېر افغان کډوال راستانه شوي دي.
د افغانستان د کډوالو او راستنېدونکو چارو وزارت وايي، راستانه شوي کډوال بېلابېلو ادارو ته ورپېژني او له زرگونه کورنیو سره یې خپله هم بېلابېلې مرستې کړې دي.
د افغانستان د کډوالو او راستنېدونکو چارو وزارت وايي، له تېرې اوونۍ راهیسې هره ورځ د تورخم، سپین بولدک، پکتیا او خوست له لارې لسگونه کورنۍ راستنېږي، چې د دوی له لوري بېلابېلو ادارو ته ورپېژندل کېږي، څو ورسره مرستې وکړي.