د دوحې غونډه د افغانستان لپاره يو جال دی، افغان حکومت بايد ګډون ونه کړي

ليکوال: عبدالله زاهدټاکل سوې چې د فبروري پر 18مه او 19مه په دوحه کې د ملګرو ملتونو په کوربتوب د افغانستان لپاره د هېوادونو او نړيوالو بنسټونو د ځانګړو استازو په ګډون غونډه جوړه سي. دې غونډې ته طالبان هم ور بلل سوي تر څو پکې ګډون وکړي، خو د نظام له طرفه تر اوسه د‌ ګډون يا نه ګډون ځواب نه دی ورکول سوی او نه بايد افغان حکومت په داسې غونډو کې ګډون وکړي، چې نه د غونډې هدف روښانه دی او نه يې هم اجنډا معلومه ده؛ نه باید افغان حکومت داسې غونډو ته په ورتګ سره خپل حيثيت ته صدمه ورسوي. د بي بي سي د يوه خبر له مخې چې د بشر حقوق دې غونډه کې د بين الملل له سرمنشي څخه د ښځو د ګډون خواهش هم کړی، تر څو هلته د ښځو نماينده‌ګي وکړي او ورسره ويل سوي چې د LGBT(هغه نارينه چې له نارينه سره جنسي اړيکې لري، هغه ښځينه چې له ښځې سره جنسي اړيکې ولري او يا هم هغه نارينه يا ښځه چې خپل جنسيت ته تغير ورکوي ايل جې بې ټي بلل کېږي) نماينده هم بايد دې غونډه کې شتون ولري. ملګري ملتونه د غربي استخباراتو ښکاره نمايندګي ده او ټولې پرېکړې یې د غربي استخباراتو په خوښه دي؛ له جوړښت څخه بيا تر ننه يې د غرب د ګټو ساتنه کړې او په هر قيمت يې کوي، نه ورته نړۍ او د نړۍ امنيت مهم دی او نه هم نړۍ کې سوله؛ بلکې د نړۍ د امنيت د خرابېدو اصل لامل هم همدوی دي، د سولې اصل دښمنان هم همدوی دي او همېشه يې په هغو سيمو کې چې د غرب استخبارات غواړي مشکلات جوړ کړي او بيا يې د حل په پار غرب راوستل او د غربي استخباراتو د ګټې د خونديتوب لپاره کار کړی.بين الملل د سولې د قائم ساتلو په نامه تأسيس سوی، تر څو ملکونه د جګړې پر ځای مشکلات بين الملل کې حل کړي، خو د اکثرو جګړو تر شا د همدې بين الملل لاس وي، چې يو ښه مثال يې د افغانستان او يوکراين د جګړې دی، د ايران سره د مشکلاتو جوړولو پلان هم د همدې بين الملل دی، په نامه خو د نړيوال طاقت دی اما يواځې يې واک د څو طاقتوره غربي مملکتونو لاس کې دی. د اسرائيلو او فلسطينيانو موضوع ته که نظر وکړو، هلته بشري ناورين او د اسرائيلو ظلمونه بين الملل ودرول؟نه!دومره غټو موضوعاتو او بشري ناورين پر ځای دوی همېش پر دې موضوعاتو بحثونه کوي چې کوم ملک کې ښځې بربنډې نه راوځي، ولي ايل جې بي ټي قانون پلانکي ملک کې نسته. نو د دوحې دغه غونډه يې هم يواځې د غربي استخباراتو يوه لوبه ده، تر څو پر طالبانو او افغانانو فشار راوړي او هغه څه ورسره ومني چې غرب يې غواړي، هغه آزادي او هغه حالت چې غرب يې افغانستان کې غوښتونکی دی، دوی به يې دلته افغانستان کې له طالبانو غواړي او غونډه کې د ټولو ګډونوالو له طرفه به د افغان حکومت پر استازو فشار واردوي، پر افغان حکومت به له دغه ګډونوالو هغه که افغانان دي يا نور ملکونه د فشار د آلې کار اخلي.ويل کېږي دې غونډه کې د افغانستان د اوسني حکومت مخالفينو ته هم دعوت ورکول سوی، يعني هغه زاړه غله، تښتېدلي يې هم را غوښتي او د بين الافغاني تفاهم په نامه غواړي يو ځلي بيا د زړو تجربه سوو غلو او وحشيانو په استعمالولو سره د افغانستان راتلونکی او شته امن او ورورولي خرابه کړي، يا هم د ښځو د حقوقو په نامه غير شرعي، د افغاني او اسلامي کلتور مخالفې غوښتنې وکړي او که ورسره ونه منل سي نو شايد د نورو فشارونو څخه هم کار واخلي ځکه لازمه نه بولم چې افغان حکومت دې پکې ګډون وکړي، ولي چې دا د غرب يو جال دی.