لیکوال: محمد فیصل
د قطر پلازمېنې دوحه کې د ملګرو ملتونو په کوربتوب د افغانستان په تړاو د ۲۵ هیوادونو د ځانګړو استازو غونډه روانه ده.
دا د خپل ډول درېیمه غونډ ده؛ لومړۍ غونډه کې یې د افغانستان اسلامي امارت بلل شوی نه و او دویمه هغه کې یې امارت د شرطونو د نه منلو له امله ګډون نه و کړی.
نړۍ پوه شوه چې د اسلامي امارت له ګډون پرته دغه ډول غونډې مثبته پایله لرلی نه شي، نو ځکه یې اسلامي امارت ته بلنه ورکړه او د دواړو لورو له همغږۍ وروسته اسلامي امارت یاده غونډه کې د ګډون کولو پرېکړه وکړه.
غونډه کې د اسلامي امارت د پلاوي مشري د اسلامي امارت مرکزي ویاند ذبیح الله مجاهد کوي چې ورسره د سوداګرۍ او کورنیو چارو وزارت استازي هم برخه لري.
پرون ناوخته د دوحې پر وخت ماښام مهال مجاهد غونډې ته خپله پیلیزه وینا واوروله؛ په وینا کې د نورو موضوعاتو تر څنګ د اسلامي امارت بهرنۍ پالیسۍ ته هم ځای ورکړل شوی و؛ مجاهد وویل: چې د اسلامي امارت د بهرنۍ پالیسۍ یو اساسي عنصر اقتصاد محوري ده.
د اسلامي امارت له دویم ځل واک ته رسیدو وروسته چې بهرنیو چارو وزارت اقتصاد محوره پالیسي پیل کړې، تر اوسه یې افغانستان خپلو ګاونډیانو ته ډیر نږدې کړی دی.
په اقتصاد محوره پالیسۍ کې تر ټولو مهم یې د سیمې اتصال (نښلول) دي چې دا د افغانستان له ثبات او همکارۍ پرته نه کیږي.
جنوبي اسیا ډیره لیوالتیا لري چې د خپلو اړتیاو د پوره کولو له پاره له مرکزي اسیا سره ونښلي او دغه نښلیدل له افغانستان پرته ممکن نه دي.
د ریل پټلۍ له لارې د مرکزي اسیا او جنوبي اسیا نښلول، د ترکمنستان ګاز پاکستان او هند ته لیږل او کاسا زر پروژې په ګډون ګڼې پروژې شته چې سرته رسول یې په افغانستان کې قوي مرکزي حکومت او ثبات ته اړتیا لري.
مولوي ذبیح الله مجاهد د دوحې په ۳مه غونډه کې ګډونوالو ته یو ځل بیا له غوږ ورتیره کړه چې د سیمې نښلول او د هغو پروژو سرته رسولو له پاره ضروري ده چې د افغانستان اوسني حکومت سره تعامل زیات شي او همدا یوازینۍ لاره ده.
مجاهد په خپلو خبرو کې واضح وویل چې دغه پروژې به د افغانستان د ملي اقتصاد احیا کې هم مهم رول ولوبوي؛ نړۍ ته په کار ده چې د افغانستان د اقتصاد د احیا او د سیمې د نښلولو له پاره له افغانستان سره شته تعامل لوړ کړي او یو اړخیز او څو اړخیز بندیزونه پای ته ورسوي.
افغانستان کې له لسیزو جګړو او بې ثباتیو وروسته اوس د سیمې د نږدې کولو او نښلولو له پاره یو طلایي فرصت رامنځته شوی.