دوستم نا لوستی دی، مګر د امرالله صالح او احمد مسعود په نسبت یې د افغانستان د حالاتو په تړاو سر ژر خلاصېږي.
څو ورځې وړاندې په تبعید کې د موازي دولت نظریه وړاندې کړه او په خبرو خبرو کې یې امرالله صالح او احمد مسعود تر ګوزارونو لاندې ونیول.
امرالله صالح یې یو بې مغزه او احساساتي او له مسایلو نا اګاه سړی معرفي کړ او احمد مسعود ته یې په ډېره وړه سترګه وکتل؛ نوموړي وویل: جنګ د ماشومانو لوبه نه ده او نه هم جنګ پر احساساتو ولاړه تیوري ده.
له دې خبرو یې د مقاومت د شوری او مقاومت د جبهې ترمنځ څومره ژور واټن او لیدلوری محاسبه کولی شو.
دوستم وویل قهرمان سازي د حل لاره نه ده، یعنې احمد مسعود ته یې ګوشزني وکړه چې دی د خپل پلار په څېر غواړي یوازې د کامرو تر مخ فلمي اکټونه وکړي او ځان د رسنیو په سترګو کې وپړسوي او له ځان څخه قهرمان جوړ کړي یا ځان یو کاریزماتیک رهبر معرفي کړي.
د دوستم په خبره چې په افغانستان کې ځمکني واقعیتونه بل ډول دي، د افغانستان په اراضي کې باید په امکاناتو او سیاسي ملاتړ بحث وشي نه په احساساتي ویناو او احساساتي دریځونو.
رشید دوستم وایي جګړه د وینا په څېر اسانه او ارزانه نه ده، د وینا او جګړې تحلیل پکار دی.
د جګړې لپاره اول د نړۍ سیاسي ملاتړ په کار دی، بیا د نړۍ مالي، نظامي، لوجستکي او تدارکاتي بندوبست باید موجود وي، له هغه وروسته باید د جګړې پلان جوړ شي او موږ بیا د جګړې میدان ته کوزېدلی شو.
د دوستم پورته خبرې د امرالله صالح په احساساتي خبرو تمسخر و او امرالله یې سپکه وړۍ کړ.امرالله صالح تېره ورځ هزاره ورونو ته وویل چې چندې وکړﺉ، وسلې واخلئ او د طالبانو په وړاندې جګړه پیل کړﺉ؛ حال دا چې امرالله خان خپل زامن د استرالیا په مجللو ماڼیو کې ساتي او هزاره ورونه یو بې نتیجې جنګ ته هڅوي.
د جنګ تجاران معمولاً پردي زامن لکه د سون توکي د جګړو بټ کې سوزوي او خپلې سرمایې پرې پړسوي.
د افغانستان خلک هوښیار دي او دوی نیمه پېړۍ کې ولیدل چې د جنګ تجارانو یې هستي او عزت د اور خوراک کړه او خپله یې د عیش او عشرت څخه ډک لذیذ ژوند ته زمینه برابره کړه.
دا ښه ده چې د جنګونو قوماندانان په خپلو کې سره چاړه او غوښه دي، د مقاومت نجات شوری کې ټول هغه د امریکا اربکیان راټول دي چې د مقاومت له جبهې سره یې ورانه ده، او جبهه کې بیا د مسعود او صالح پرته څوک نشته، مسعود او صالح نه مالي ظرفیت لري، نه ولسي ریښې لري او نه هم نړۍ وال باور لري فلهذا دا څو یاغي باغي احساساتي هلکان یې پیدا کړي چې هغوی هم هره ورځ د هندوکش په واورو کې پټ ګرځي چې لږ سر پورته کړي د طالبانو لخوا ورته د مرګ ټکټ ورکړل شي.
دا د غریب او غُربه زامن که د خپل د مور، پلار، ورور او یو مشر خبره واوري ممکن د صالح او د مسعود لپاره ځانونه مرګ ته ور نه کړي.
دا جنګ ناروا، نا مقدس او په ټوله کې د احمد مسعود او صالح لپاره جنګ دی؛ ای د غریبو زامنو! همدا د شر او فساد لارویان چې په قدرت کې وو، کومه ورځ یې له کومې سختې ژغورلي یاست؟ نو پس هوشیار باش!
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.