د کانونو او پټرولیم وزارت وايي، د کابل د جگلدلک او د هرات د باریت کان د دوو کانونو تړونونه یې له دوو شرکتونو سره کړي دي.
له یاد وزرات څخه په خپره شوې خبرپاڼه کې ویل شوي، د کابل جگدلک د یاقوتو کان چې ۶.۸۹۵ کیلومتره مربع مساحت لري د ۲۷.۵ مېلیونه ډالرو په پانگونې سره او د هرات باریت کان چې ۵.۷۵ کیلو متره مربع مساحت لري د ۵.۹۹۰.۴۴۴ ډالرو په پانگونې سره د سایر اریانا هایلند او د وحدت نیازي د کانونو داستخراج او پروسس شرکتونو سره لاسلیک کړل.: «دغه دوه کانونه د ۱۵ کلونو لپاره په قرارداد ور کړل شول، په دې شرط چې خپلې ژمنې او د کانونو د قانون او طرزالعمل مطابق به خپل کار او فعالیت ترسره کوي.»
د خبرپاڼې له مخې، د جگدلک یاقوت کان په برخه کې د اسلامي امارت ونډه ۴۴ سلنه او د هرات باریت کان کې ۵۰ سلنه پروسس شوې ونډه لري.
اوسمهال د هېواد د گڼو کانونو د استخراج چارې روانې دي، چې هره میاشت د حکومت خزانې ته پرې مېلیونونه افغانۍ عواید راځي، چې یاد عواید په رغنیزو برخو کې کارول کېږي.