د رحمت الله نبیل په مشرۍ، د افغانستان د آزادۍ ملي ګوند د افغانستان ژغورنې له ملي مجمع څخه جلا شو؛ دغه ګوند ویلي، چې د دوی ځینې لیدلوري او تګلارې په مهمو برخو کې د افغانستان ژغورنې ائتلاف له چوکاټونو سره بشپړه همغږي نه لري او جلا دي.
رحمت الله نبیل د پرځېدلي جمهوریت پر مهال د ملي امنیت د رئیس په توګه دنده اجراء کړې ده، د پخوانیو چارواکو په منځ کې له مخکښانو شمېرل کېده، له افغانستان څخه تر تېښتې وروسته یې په تبعید کې د افغانستان د ازآدۍ په نوم یو ګوند د خپلو همفکرانو د ور یوځای کولو او شخصي ګټو پالنې په موخه جوړ کړ.
په دې وروستیو کې بیا د افغانستان ژغورنې په نوم یوې مجمع هم په تبعید کې د خپل موجودیت اعلان وکړ او ادعا یې لرل چې د افغانستان ازآدۍ ګوند په شمول یې، ۳۲ ګوندونه او ډلې – ټپلې ورسره یو ځای کړې دي؛ خو د جوړېدو له ورځې د یاد مجمع په منځ کې اختلافات پیل شول او خپل اوج ته ورسېدل.
د اختلافاتو او ګڼو نیوکو په دوام، دا ځل د رحمت الله نبیل په مشرۍ د افغانستان د ازآدۍ ګوند هم مخه ښه ورسره وکړه او جلا شو؛ دغه ګوند په خپله اعلامیه کې، د ژغورنې مجمع سیاسي خپلواکي تر سوال لاندې راوستې او ادعا یې کړې، چې د خپل ګوند، د سیاسي خپلواکۍ د ساتلو په موخه یې دغه پرېکړه کړې ده.
له ژغورنې مجمع څخه د رحمت الله نبیل جلا کېدل، د دغه ائتلاف د تګلارې، موخو او سیاسي خپلواکۍ نه لرلو په اړه خورا ډېر شکونه راپیدا کړي دي، چې ښايي له امله یې نور ګوندونه هم د جلا والي اعلان وکړي او د ژغورنې مجمع له منځه لاړه شي.
د افغانستان ازآدۍ ګوند، په ژغونې مجمع کې د ټولو اقشارو او قومونو په پراخه کچه نشتون ته په اشارې سره په خپله اعلامیه کې ویلي، باور لري چې د هېواد راتلونکی یوازې هغه مهال روښانه دی چې ټول اقشار او قومونه په سیاسي خوځښتونو کې په پراخه کچه برخه واخلي.
دوی ویلي، ګوند باور لري چې د افغانستان د اوسني تاریخي وضعیت اړتیا د داسې نويو ائتلافونو جوړېدل دي چې د ولسواکۍ، عدالت او د وګړو پر مساوي حقونو ولاړ وي. د افغانستان د ازآدۍ ګوند یادي څرګندونې په داسې حال کې کړې، چې په ژغورنې مجمع کې له تېرو شاوخوا دوه اوونیو راهیسې خپل منځي شخړې، شخصیت وژنې او په ائتلاف کې د واک پر سر جنجالونه اوج ته رسېدلي دي.
د افغانستان ژغورنې مجمع په وړاندې بیرونیو مخالفتونو هم زور اخیستی؛ په دې وروستیو کې د افغانستان د لویدیځي حوزې په نوم یوې سیاسي شوری هم، د دغه حوزې په استازیتوب په ائتلاف کې ټول استازي رد کړي وو او د دغه مجمع غړي یې د لسیزو ناکامو تجربو عاملین ګڼلي وو.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.