په افغانستان کې له تېرو دریو کاله راپدېخوا نسبي امنیت راغلی دی او د ارام ساه یې اخیستې ده؛ دا هغه مهم موارد دي چې جنګسالارانو له ولس څخه په بنسټیزه توګه اخیستي وو. اوس چې جنګسالارانو له هېواده پښې سپکې کړې دي، د بهرنیو هېوادونو د تبلیغاتي پروژو د پلې کولو په موخه د افغانستان په داخل کې د رواني امنیت او ثبات د سبوتاژ ناکامه هڅې کوي.
کله چې د فزیکي امنیت د سبوتاژ هڅې له پرله پسې ماتې سره مخ شوې، شریرو عناصرو د ولس د رواني امنیت د ګواښلو هڅې پیل کړې؛ رواني جګړه او رواني امنیت اخلال یا تأمینول تر فزیکي جګړې ارزانه، بې تلفاتو او تر یو حده بریالۍ ثابته شوې ده، ځکه د ولس او مقابل طرف پر اذهانو تأثیرات لرلای شي او عامه اذهان په مثمر ډول مدیریت کولای شي.
د هېواد په داخل کې د رواني امنیت د سبوتاژ او اخلال په موخه، بغاوتګر د فیسبوکي تبلیغاتو او پروپاګند لپاره خامو موادو ته اړتیا لري، تر څو په تکثیر یې عامه اذهان مغشوش کړي؛ دغه موخې ترلاسه کولو لپاره د ښارونو په عامه ځایونو کې ناکامه بریدونه ترسره کوي.
په عامه ځایونو کې له یادو بریدونو څخه هدف د ولس په منځ د ویرې او ډار خپرول دي، د دغه ډار د ښه ډېر خپرولو لپاره بریدګر ویډیو کلیپونه اخلي او خپلو فیسبوکي اجیرانو ته یې د خپراوي لپاره لېږي؛ له دې کار څخه یې یوازینی هدف د ولس د رواني امنیت ځپل دي.
هېره دې نه وي چې دغه ناکام بریدګر ډېری وخت بیرته د همدې خیالي جبهو له خوا په دامونو کې هم لوېږي، چې انجام یې مرګ یا زندان وي؛ دوی ته وعده ورکول کېږي چې پیسې ورکوي، خو کله چې هلته ځي، له یوې منظمي چاپې سره مخ کېږي او د زندان د تمبو شا ته غورځول کېږي.
د تبلیغاتي ویډوګانو د کریډیټ له امله بیا بهر کې مېشت امر ورکوونکي مشران د پیسو لوږې اخیستي او د ترلاسه کولو لپاره یې هره لاره چاره ترسره کوي. په خیالي جبهو کې د دغه تبلیغاتي ویډیوګانو په توسط اخیستل کېدونکې پیسې محدود شمېر خلکو او کړیو ته رسېږي؛ چې دې چارې د دوی په منځ کې د هغه افرادو د ژورو اختلافاتو د را ټوکېدو لپاره زمینه مساعده کړې، چې معلومه ونډه نه ده ورکول شوې، له همدې امله د خیالي جبهاتو تر منځ ژور اختلافات را ټوکېدلي او حتیٰ زړې دښمنۍ یې بیا را احیاء کړې دي.
یادؤنه: په هندوکش غږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکش غږ توافق ورسره شرط نه دی.