لیکوال: عادل افغان
په افغانستان کې له تېرو نږدې دریو کلونو راهیسې د اوسني حکومت، ټولنې او په ټولنه کې افغانانو پر وړاندې د رواني جګړې یو نوې بڼه پیل شوې چې زموږ د ټولې نږدې هره برخه په نښه کوي.
دا رواني جګړه له لویو مشهورو رسنیو نیولې بیا تر ټولنیزو رسنیو پورې رارسېږي او د سېلاب په څېر روانه وي، لویه برخه ونډه وال یې په شعوري توګه مخ ته وړي او یوه کوچنۍ برخه یې بیا د دغو کسانو تر اغېز لاندې راځي او په غیر شعوري توګه د دې رواني جګړې برخه ګرځي.
دا رواني جګړه کله د اوسني نظام مشران په نښه کوي، کله موږ منلي اسلامي او افغاني ارزښتونه په نښه کوي او کله هم پکې په لوی لاس د تاریخي اشخاصو، مشرانو، قومونو او پرګنو د هویت او شخصیت وژنې هڅه کېږي.
په دې جګړه کې کله د حجاب پر وړاندې حشر کېږي، کله د امر بالمعروف او نهی منکر پر وړاندې چې دواړه منلي او مهم اسلامي احکام او اوامر دي.
دا یې یوازې دوه نمونې وې چې دلته مو اشاره ورته وکړه، دې ته ورته په لسګونه او سلګونه نور موارد دي چې د رواني جګړې تر حشرې لاندې راځي او په لوی لاس سپین پکې تور او تور پکې سپین معرفي کېږي.
دا رواني جګړه ډېره منظمه، سیستماتیکه او ستراتېژیکه روانه ده، پیاوړې استخباراتي ريښې لري، پیاوړي لوبغاړي لري او لویه پانګونه پرې کېږي. اصلي موخه یې هم زموږ په ټولنه کې د بې باورۍ فضا خپرول، کرکې، تعصب، قومي، سمتي، ژبنیو او نورو تفرقو ته زور ورکول، پر خپل ملت، وطن، جغرافیې، مشرانو، نظام، تاریخي څېرو او لویو اشخاصو د خلکو باور راکمول دي.
لکه مخکې مې چې یادونه وکړه، د دې جګړې لویه برخه، که هغه افراد دي، یا ادارې او ډلې په شعوري توګه ورسره مل دي، په بدل کې یې پیسې او امکانات ورکول کېږي او بېلابېلې نورې ژمنې ورسره کېږي، خو یوه کوچنۍ او ناخبره برخه یې بیا د لومړۍ هغې تر نفوذ او اغېز لاندې راځي او په غیر شعوري توګه او د حقیقت او واقعیت له درک کولو پرته ورسره یو ځای کېږي.
دا رواني جګړه تر ډېره امریکايي، برېټانوي، فرانسوي، جرمني، د سیمې او نورې نړۍ استخباراتي ادارې مخکې وړي، دا جګړه په بېلابېلو کچو قراردادیان لري، چې لویه برخه یې له هېواده بهر دي، په دې رواني جګړه کې رسنۍ دخیلې دي، اشخاص پکې شته او لوی لوی بنسټونه پکې شته، چې په ډلهییزو او هم په ټولنیزو رسنیو کې د عامه ذهنیتونو، فکرونو او واقعیتونو د بدلولو هڅه پکې کېږي.
تازه مورد یې هم د اوسني حکومت پر ځينو مشرانو د تورونو لړۍ ده. که د حکومت مشر په وزارت، ریاست او یا هم بل کوم پوست کې پاتې هم وي، دا رواني جګړه یې په نښه کوي او که د مشرانو له امیر له خوا له یوه ځایه بل ته بدلېږي او لېرې کېږي هم، د دې رواني جګړې له خوا په نښه کېږي، له کوم سند او ثبوت پرته پاک او صادق مشران، وزیران، رییسان او نور چارواکي پر فساد او نورو مسایلو کې دخیل بلل کېږي، خو که یې د ثبوت په اړه یې ترې وپوښتې، اول خو ځواب نه وايي او که وايي یې هم هغه ټول له شایعاتو ډک او له حقیقته لېرې وي.
له دې لیکنې مې موخه دا ده چې بهرنیو استخباراتو زموږ په هېواد کې یوه مبهمه، پراخه او خطرناکه رواني جګړه پیل کړې، چې هرڅوک یې باید په اړه بیدار اوسي، په پټو سترګو قضاوت ونه کړي، خبره یې ونه مني او په غیر شعوري توګه د دې رواني جګړې برخه ونه ګرځي، ځکه دا جګړه هماغو کسانو پیل کړې چې زموږ له خلکو، ملت او هېوادوالو سره یې شل کاله مخامخ نظامي، فرهنګي او په بله هره جبهه کې جګړه وکړه.