د تدارکاتو ملي کمېسیون شاوخوا د ۸ میلیارده افغانیو په ارزښت بېلابېلې پروژې منظورې کړې. د ریاستالوزراء اقتصادي مرستیال ملا عبدالغني برادر اخوند په مشرۍ؛ د تدارکاتو ملي کمېسیون، شاوخوا د ۸ میلیاردو افغانیو په ارزښت د ۲۵ پروژو قراردادونه منظور کړل.
د یاد کمېسیون نوبتې غونډه چې نن په مرمرینه ماڼۍ کې جوړه شوې وه، له اجنډا سره سم ۳۱ پروژې د منظورۍ لپاره وړاندې شوې، چې له جملې یې د ۲۵ پروژو قراردادونه منظور، د پنځو پروژو قراردادونه لغوه او د یوې پروژې قرارداد بیاځلې ازادې داوطلبۍ ته وړاندې شو.
د منظور شوو پروژو له جملې د غزني ولایت د ۱۰۰ بستریز روغتون د پاتې ساختماني چارو بشپړول، د بخش آباد بند د انحرافي تونلونو پاتې چارې تکمیلېدل، د کابل ښار د یوشمېر داخلي سړکونو بیارغونه، د کمال خان بند د درېیمې برخې پاتې چارو بشپړول او یوشمېر نورې پروژې شاملې دي، چې په پلې کېدو سره به یې سلګونو بې روزګاره هېوادوالو ته کاري فرصتونه برابر شي.
دا په داسې حال کې ده چې د پلازمېنې کابل په شمول د ولایتونو په کچه د رغنیزو پروژو کارونه په چټکۍ سره روان دي.