د ټولګټو چارو وزارت ویاند محمد اشرف حق شناس وایي، چې د سالنګونو پر لویه لار د ټولګټو وزارت له خوا تر بلې خبرتیا هرډول بار وړونکو ټېلري وسایطو ته د تګ راتګ اجازه ورکړل شوه.
ښاغلي حق شناس زیاته کړې، چې یاده لار د تېرې جوزا میاشتې په ۲۰مه نېټه د هر ډول ټېلري وسایطو پرمخ تړل شوې وه.
د نوموړي په وینا، ټولګټو وزارت هڅه کوي، چې له یوې خوا پر یاده لویه لار کار وکړي او له بلې خوا هېوادال په اسانۍ سره پر یاده لویه لار تګ راتګ وکړي.
د یادونې وړ ده، چې ټولګټو وزارت د دوشي – بامیان (ښکاري درې) سړک د بیارغونې کار پیل کړی دی او یاد وزارت هڅه کوي، چې دغه سړک د وسایطو د تګ راتګ لپاره چمتو کړي.