د ټولګټو وزارت ویاند محمد اشرف حقشناس په یوه خبرپاڼه کې ویلي، چې د سالنګونو لویې لارې د پاتې برخو د بیارغونې کار یې پیل کړی، چې د ښه ترسره کېدو په موخه، اصلي مسير د وسایطو د تګ راتګ پرمخ تړل کیږي.
نوموړي زیاته کړې، چې مسافر وړونکي موټر کولای شي له چمتو شوي بدیل فرعي مسیر څخه له دواړو خواوو ۲۴ ساعته تګ راتګ وکړي؛ خو ټولو بار وړونکو وسایطو ته په نوبتي ډول یوه شپه له شمال څخه سویل لوري او بله شپه له سویل څخه شمال لوري ته په اصلي مسیر د تګ اجازه ورکول کیږي.
د یادونې وړ ده، چې ټولګټو وزارت تېر کال د سالنګ د یو شمېر برخو د کانکریټ اچونې کار بشپړ کړی دی.