د تنظیمي جګړو د یو قوماندان احمد شاه مسعود فرهنګي مسؤل یونس قانوني، چې د شر او فساد شورا د غړیتوب تر څنګ، د نوې ایجاد شوې مجمع غړیتوب هم لري، د خپلو څرګندونو پر مهال یې ویلي، چې مونږ په افغانستان کې د عادل نظام د راوستلو په موخه مبارزه کوو.
د عادل نظام په اړه د نوموړي پر تعبیر پوښتنې پیدا کېږي؛ مثلاً هماغسې عادل نظام راولي چې په ۲۰۰۱م کال کې، د نړیوالې ټولنې له ۱۲۰ ملیارد ډالرو څخه یوازې پنځوس میلیونه ډالر د یونس قانوني او عبدالرب رسول سیاف تر منځ حیف و میل شوې!؟
د یونس قانوني پر عدالت او سپېڅلتیا لږ تم کېږو؛ یونس قانوني د پرځېدلي جمهوریت په راتګ سره، د پوهنې وزارت وزیر شو، هماغه مهال یې خپل ورور د اخاذي ګانو په موخه له ځان سره مقرر کړی و، قراردادي شرکتونو ته به یې د تدارکاتي پروسو په جریان کې ورور ور معرفي کړ او له هر قرارداد څخه به شاوخوا ۳۰ سلنه د وزیر برخه وه .په هماغه وخت کې د فساد په ضد د مبارزې کمیسیون تائید شوي اسناد له رسنیو سره شریک کړل، چې ۳۰۰،۰۰۰ ډالر، دده د ۳۰ فیصده سهم مقدار ښودل شوی و.
همدا ډول له ځینو خیالي قراردادونو څخه پرده پورته شوه، چې د پوهنې وزارت لپاره د مېزونو، کوچونو، چوکیو او فرنېچر قرارداد ترسره شوی و، تدارکاتي پروسه یې بشپړه شوې وه، مګر خریداري نه وه شوې، بلکې پیسې یې د یونس قانوني جېب ته لوېدلې وې.
راشئ چې د یونس قانوني د انصاف او عدالت پر یو بل اړخ باندې هم ور وګرځو:
۱ – یونس قانوني خپل زوی یاسر قانوني په لندن کې د افغانستان سفارت سکرتر مقرر کړی و او همدې زوی ته یې د انګلستان د شاهي دولت له لوري د تابعیت اسناد هم واخیستل.
۲ – خپله لور یې چې مریم قانوني نومېږي او د بسم الله خان اینګور ده، نوموړې یې هم په انګلستان کې د افغانستان سفارت کارمنده مقرر کړې وه.
۳ – بل زوی یې راشد قانوني د افغانستان د امنیت شورا په ریاست کې مشاور مقرر کړی و.
۴ – نجیب امان د یونس قانوني ورور دی، چې د کورنیو چارو وزارت، له تروریزم سره د مبارزې د رئیس په توګه مقرر شوی و.
۵ – شریفي یې بل ورور و، چې د تفتیش رئیس و او کابو شل کاله یې دغه عایداتي اداره پرېنښوده.
۶ – بل ورور یې د پارلمان د عملیاتي او امنیتي چارو سمبالوونکی و.
۷ – د شکیب شریفي په نوم وراره یې بیا د مالیې وزارت، د ارشد سلاکار په توګه مقرر و.
همداسې یونس قانوني د استخباراتي پروژو د ترلاسه کولو او تطبیق په موخه د “افغانستان نوین” په نوم یو ګوند جوړ کړی و، د دوه اسیايي هېوادونو(ایران او روسیې) له لوري تمویلېده. بالاخره په پوهنې وزارت کې په چور شویو پیسو او د ګوند له ادرسه ترلاسه کړیو پیسو جمهوري ریاست ته نوماند شوی و، خو بریالی نشو.
اوس د سیاف په شمول له پخوانیو غلو سره یو ځای شوی او په افغانستان کې هم د عدالت راوستنې په نوم مبارزه کوي؛ په داسې حال کې چې د دوی عدالت د امریکايي یرغل پر مهال خورا څرګند و، چې له پرځېدلي جمهوریت څخه یې د سهامي شرکت کار اخیست او د خپلې کورنۍ نا اهل غړي یې د وزارتونو او ادارو پر مهمو پوسټونو مقررول.
یادؤنه: په هندوکش غږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکش غږ توافق ورسره شرط نه دی.