د صنعت او سوداګرۍ وزارت مسئولینو نن د حکومت د اطلاعاتو او رسنیو په مرکز کې د امارتي ادارو د یو کلنو لاسته راوړنو د تشرېح پروګرام په لومړۍ ورځ، د یوه خبري کنفرانس پر مهال، په تېر کال کې د یاد وزارت د کړنو او لاسته راوړنو په اړه له رسنیو سره معلومات شریک کړل.
د صنعت او سوداګرۍ وزارت مسئولینو وویل: په تېر کال کې د افغانستان د سوداګرۍ حجم شاوخوا لس میلیارده ډالرو ته رسېدلی، چې له دې جملې ۱.۸ میلیارده یې صادرات او څه باندې ۸ میلیارډه یې واردات وو.
د سوداګرۍ وزارت مسئولینو زیاته کړه، په تېر کال کې د منځنیو او کوچنیو تشبثاتو د ملاتړ او پیاوړتیا او له بېلابېلو موسسو سره د تفاهم لیکونو د لاسلیک له لارې، ۶۴۶۰۱۵ شپږ لکه شپږ څلوېښت زره پنځلس تنو ته په مستقیم او شاوخوا ۴۴۱۸۵۷۰ څلور ميليونه څلور سوه اتلس زره او پنځه سوه اويا تنو ته په غیر مستقیم ډول کاري فرصتونه رامنځته شوي دي.
د سوداګرۍ وزارت وایي، د وروستي یوه کال پر مهال د سوداګرۍ او ترانزیټ د اسانتیا برخه کې د سیمې او نړۍ له هېوادونو سره، لس هوکړه لیکونه وروستي شوي، د روسیې، چین، پاکستان، ایران، اوزبیکستان، ترکمنستان، قزاقستان، قرغیزستان او د سیمې نورو هېوادونو سره په اقتصادي، سوداګریزه، ټرانزیټي او د پانګونې برخه کې همغږي پیاوړې شوې او شاوخوا ۶۵۰ تنو بهرنیو پانګوالو ته له افغانستان څخه د لیدنې پر مهال اړینې اسانتیاوې برابرې شوي دي.
د سوداګرۍ وزارت د مسئولینو د معلوماتو له مخې، تېر کال کې ۱۰۰ کارخونې پرانیستل شوي، شاوخوا ۱۰۰۰ تولیدي او صنعتي شرکتونو ته جوازونه او څه باندې ۶۵۰ شرکتونو ته تعرفې ورکړل شوي، د پانګونې څه باندې ۲۳ زره جوازونه تجدید، تمدید او اصلاح شوي، د خودکفایۍ کچه له ۴۸ قلمه څخه ۱۳۳ ته لوړه شوې او د سوداګرۍ برخه کې د اسانتیاوو، بیو کنترول او کنترول کمېټو په رامنځته کېدو سره، د لومړنیو او خوراکي توکو په بیو کې ۲۸ سلنه کموالی راغلی دی.
همدارنګه د سوداګرۍ وزارت وايي، وروستي یوه کال کې روسیې ته د افغانستان د صادراتو کچه ۵۴، ترکیې ته ۵۳، ایران ته ۱۹، چین ته ۱۶ او قزاقستان ته ۲.۵ سلنه زیاته شوې ده.
دغه راز د افغانستان او قزاقستان د خصوصي سکتور ترمنځ د نېږدې ۲۰۰ میلیونه ډالرو او د افغانستان او ترکمنستان د خصوصي سکتور ترمنځ د ۱۳ میلیونه ډالرو په ارزښت تړونونه هم لاسلیک شوي دي.
د وزارت مسئولینو، د صنعتي پارکونو پراختیا او د نویو صنعتي پارکونو جوړول، د ځانګړو اقتصادي زونونو رامنځته کول، د کورنیو تولیداتو معیاري کول، پر وارداتي توکو د کیفي معیاراتو وضعه کول او له ګاونډیو، سیمې او نړۍ له هېوادونو سره د سوداګریزو اړیکو پیاوړتیا، د وزارت د راتلونکو پلانونو په توګه یاد کړل.
نن د حکومت د اطلاعاتو او رسنیو په مرکز کې د امارتي ادارو د یو کلنو لاسته راوړنو د تشرېح پروګرام پيل شو چې د سنبلې میاشتې تر پایه به دوام وکړي او د ټولو امارتي ادارو د تېر يو کلن فعاليت او لاسته راوړنو معلومات به له رسنيو او خلکو سره شريک شي.