د سټنډرډ ملي اداره وايي، د نفتي توکو د تثبیت او کنټرول پروسه په دوامداره توگه د هېواد په واړو بندرونو کې روانه ده.
له یادې ادارې څخه په خپره شوې خبرپاڼه کې ویل شوي، د سټنډرډ ملي اداره د هېواد د بندرونو په کنټرولولو سره د ټیټ کیفیت نفتي توکو د ننوتلو مخه نیولې او کوښښ کوي چې د خپلو گرانو هېوادوالو د روغتیا او خوندیتوب او د مصرف کوونکو د گټو د تامین لپاره د بېکیفیته توکو مخه ونیسي.: «د کره راپورونو له مخې د ۱۴۰۳ لمریز کال د وری(حمل) میاشت کې د ټولو بندرونو له لارې په ټولیزه توگه (۷۳۰۰) ټانکره نفتي توکي چې وزن یې (۲۳۳۴۳۵.۹۸۲) ټنه کېږي، تثبیت کیفیت شوي چې د دې له جملې څخه (۱۳۱) ټانکره چې ټوليز وزن يې(۴۰۶۸.۴۱) ټنه کېږي د سټنډرډونو خلاف تثبیت شوي دي.»
یاده اداره وايي، د هېواد په ټولو بندرونو کې د هغو توکو د وارېدو مخه نیسي، چې کیفیت یې خراب وي او خلکو ته د گټې پر ځای زیان اړوي.
د سټنډرډ ملي اداره هره اوونۍ د هغو توکو نوملړ رسنیز کوي، چې کیفیت یې خراب وي او بېرته یې یادو هېوادونو ته لېږي، له کوم هېواد چې صادر شوي وي.
یادې ادارې له ټولو سوداگرو غوښتي، چې هېواد ته د بېکیفیته توکو د وارد کېدو څخه ډډه وکړي.