د ریاست الوزراء اقتصادي معاونيت په يوه خبرپاڼه کې وايي، چې د ملا عبدالغني برادر په مشرۍ د اقتصادي کميسيون غونډه کې پرېکړه شوې، چې هر هغه شرکت يا پانګوال چې غواړي د سړو خونو جوړولو په برخه کې پانګونه وکړي، پنځه کلن مالياتي معافيت ورکول کېږي.
سرچينه وايي، هېواد کې د سړو خونو نشتوالی او د ګاونډيو هېوادونو له لوري د کرنيزو محصولاتو د موسمي تعرفو لوړول بزګران او سوداګر له سخت مالي زيان سره مخ کوي او د همدې زيان د مخنيوي په موخه د سړو خونو سوداګرو ته مالياتي معافيت په نظر کې نيول شوی.
د اقتصاد کميسيون نوبتي غونډه کې پر دې سربېره د غزني ولايت په مرکز کې د کرنې، اوبو لګولو او مالدارۍ وزارت پر ځمکه د سړې خونې او کارخانې جوړولو طرحه هم تاييد شوې ده.
د اقتصادي چارو شنونکي، د سړو خونو برخه کې د پانګوالو لپاره پنځه کلن مالياتي معافيت يو بې ساری ګام ګڼي او ډاډ ورکوي چې په کور دننه د کرنيزو محصولاتو ساتنه هېواد اقتصادي ثبات ته رسولی شي.