د پنجشېر ولايت مقام په يوه خبرپاڼه کې وايي، چې د سږ کال په اتمه بولۍ کې د دغه ولايت له کانونو تازه استخراج شوي ۳۳۵۷ قراطه زمرد د ۳۳۲۴۵۰ ډالرو په ارزښت وپلورل شول.
سرچينه وايي، په دغه بولۍ کې کورنيو او بهرنيو پانګه والو برخه لرله چې ډېره برخه يې د پنجشېر ځوانو سوداګرو تشکيلوله.
د ولايت مقام په خبرپاڼه کې راځي، چې د پنجشېر د قيمتي ډبرو د کانونو استخراج په دغه ولايت کې د سوداګريزو فرصتونو پراختيا ته زمينه برابره کړې ده.
سرچينې دغه راز د ولايت د رهبرۍ له قوله ليکلي، چې هڅه کېږي په دغه ولايت کې په بېلابېلو برخو کې کاري فرصتونه رامنځته کړي، څو ځوانانو ته کاري زمينه برابره شي.