د شر او فساد ډلې د خپلې تیاره او شرمناکې ماضي د پټولو او خپلو بدو او سپکو اعمالو ته د ښې بڼې د ورکولو، د خپلې دورې د بدو او ناوړه پېښو د سرچپه ښودلو لپاره په افغانستان کې شرموونکې هڅې کوي. دوی له هرې لارې او وسیلې استفاده کوي چې خپله منفي پایله مثبته کړي؛ خو بیا هم دې ته تیار نه دي چې له خپلو ناوړه کړنو څخه توبه وباسي.
د افغانستان د اشغال په دوه لسیزو کې د افغان سیاستوالو تورې څهرې د ټولو لپاره څرګندې او د دوی کړنې او اعمال د لمر غوندې روښانه دي. ملت هیڅکله د دوی په توره دوره کې د افغانستان پر خلکو د تېرو شویو کړاوونو او بدبختیو ورځې نه هېروي او بیا یې پر سترګو د غفلت پرده نه غوړېږي.
د دوی ناوړه کړنو د افغانستان د تاریخ پاڼې له شرمناکو پېښو او ګڼو تېروتنو او خطاګانو څخه د تل لپاره ډکې کړې دي، چې دا د تېرو او راتلونکو نسلونو لپاره د ښه او بد د توپیر معیار ګرځېدلی دی.
حال دا چې د قدرت درلودلو او د حکومت پر چوکۍ د کېناستلو موخه باید دا وای چې خلکو ته خدمت وشي او د هېواد د خپلواکۍ او ازآدۍ لپاره په فزیکي او رواني توګه کار وشي.
نه دا چې د دښمن په صف کې له هفوی سره اوږه په اوږه ودرېږي او د ملت د حیثیت د خرابولو او د هیواد ورانولو لپاره هڅې وشي او همدا راز د ښکېلاک ګرو ناوړه موخو ته رسېدل د شر او فساد ډلو د حکومتونو لومړیتوبونه وګرځېږي.
له بده مرغه هغه ملت چې پوهان، لوستي کسان یا په اصطلاح روڼ آندي یې د دې پر ځای چې د خپلو خلکو ترڅنګ ودرېږي، د بې رحمه او نامرده دښمن پر وړاندې د مقابلې لارې چارې او حل لارې وړاندې کړي، هغوی خپله د دښمن په ناولې غېږه کې ولوېدل، خپل ملت یې د ښېکلاک د خونړیو او ترخو حملو او بریدونو په وړاندې تنها پرېښود.
خو د شر او فساد ډلو دا باور نه درلود چې افغان ملت همېشه له اسلام سره ژوند کړی، خپل رښتینې ځواک او قوت یې له الله تعالی څخه غوښتی او هیڅکله د دښمن په دام کې نه پاتې کېږي، بلکې آزادي به د الله تعالی په مرسته او د خپلې زړورتیا او مېړانې په برکت ترلاسه کوي.
همدا وو چې د شر او فساد د حکومت د تېارو ورځو په اوږدېدو سره، د ریښتیني جهاد له افق څخه د ازآدۍ لمر راوخوت. د اسلام مبارزین او ریښتیني مجاهدین په سنگرونو کې مضبوط ودرېدل، تر هغې چې بالاخره زړونه د آزادۍ په آرمان خوښ شول، د خپلواکۍ لارې هوارې شوې، د عدل او ازادۍ لمر د ظلم او ستم د غرونو له شا راښکاره شو.
اوس هغه خلک چیرته دي چې فکر یې کاوه دا خاوره او دا ګران بیه خزانه به د تل لپاره د شر او فساد په ولکه او قدرت کې پاتې شي؟!
هېره دې نه وي چې د ظلم او ستم وخت به یوه ورځ پای ته رسېږي، ځای به یې عدل او انصاف نیسي، سرغړونکي او ناوړه ګټه اخیستونکي به په دنیا او آخرت کې رسوا شي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.