ليکوال: عمران آغا
هغه خلک چې شل کاله یې د افغانستان د مظلوم اولس په سرنوشت لوبې کولې، په دې وروستیو کې یې له خپل منځني اختلاف څخه د رسنیو پر مخ پرده پورته کړه.
د تېرې ادارې بې کفایتي، بې اتفاقي، چور او چپاول او د ملت په سرنوشت لوبې کول ټولو افغان ملت ته څرګندې دي، هر لوړ پوړي چارواکي خپلو شخصي منافعو ته کار کاوه، د شر او فساد اداره یې جوړه کړې وه.
مسعود اندرابي د تېرې ادارې د لوړ پوړو چارواکو او د جمهوریت په رازونو خبر شخص دی، نوموړي له تلویزونو سره په مرکو او شخصي کلیپونو کې احمد مسعود ته د کوچني هلک خطاب کوي، د نصیحت ترڅنګ اخطار هم ورکوي، د دې ترڅنګ غني د خائن او حمدالله محب د ملي خائن او غله په نومونو یادوي.
دا څرګندونې په دې دلالت کوي چې تش په نامه مقاومت سالم رهبریت نلري، بې اتفاقه دي، هغه څهرې پکې یو ځای شوي چې یو ځل یې ملت ته امتحان ورکړی، د دویم ځل لپاره پر دوی باور کول هسې خیال او خوب دی.
د اندرابي څرګندونې دومره جدي نه دي، لا به هم دوام لري، خپل اصلیت د ملت پر وړاندې پخپل لاس نور هم څرګندوي، په کیمپونو کې پراته خلک دي، بل کار او روزګار نلري.
د افغانستان اسلامي امارت د اولس له مابین څخه را پورته شوی او جوړ شوی نطام دی، د ملت په درد دردمن دي، د ملت ریښتیني خادمان دي، سالم او پاک رهبریت لري، متحد او منظم دي، قوي رهبریت لري د هر تیري په مقابل کې په یو غږ ولاړ دي.
د افغانستان اسلامي امارت مجاهدین د تش په نوم مقاومت او د نظام پر خلاف هره دسیسه په نطفه کې خنثا کوي، د افغانستان په ټوله خاوره کامله سلطه او حاکمیت لري.
د یادونې وړ ده چې اندرابي یو څه موده د تېرې ادارې د ملي امنیت رئیس وه، ۷ کاله یې د ملل متحد سره کار کړی، په ۱۳۹۷ کال کې د کورنیو چارو وزیر مقرر شو، د غني سره د نه جوړجاړي په وجه په ۱۳۹۹ کال کې له دندې ګوښه شو.
د اندرابي د خبرو په ځواب کې به تېرې ادارې نور چارواکي خپل ځانونه سپینوي او دا لړۍ به دوام لري.