شر او فساد ډلې د وروستیو سختو ماتو او ناکامیو د پټولو په موخه، دا ځل د تېر (۲۰۲۴) مېلادي کال د فعالیتونو اړوند داسې خیالي ارقام او دروغجن معلومات خپاره کړي، چې په تېر کې یې کم ساری لیدل کېږي. دوی ویلي، چې په تېر ۲۰۲۴م کال کې په خپلو خیالي او مجازي بریدونو کې نږدې ۵۰۰ طالبانو ته مرګ ژوبله اړولې ده؛ هغه ادعا چې له واقعیت او حقیقت سره هیڅ اړخ نه لګوي.
دا ډله چې له تېرو نږدې دریو کلونو راهیسې یې له هېواده بهر د خپل فعالیت اعلان کړی دی، په ټولنیزو رسنیو کې یې د افغانستان د نا امن ښودلو او همدا راز په دغه هېواد کې د جګړې د بیا پیل په موخه د نوي خریدار د موندلو لپاره پراخ تبلیغات پیل کړي دي، خو په دې دومره موده کې یې نه تنها دا چې د جنګ خریدار ونه موند، بلکې خپل له منځه تللی حیثیت یې دومره لا پسې خراب کړ، چې اوس نه پرې په کور دننه څوک باور کوي او نه یې هغه خواخوږي په خوله پیاز ماتوي چې نږدې دوې لسیزې یې نه ستړي کېدونکي چوپړونه ورته وکړل.
دا شر خوښې، فتنه ګره او منفوره جبهه په تېر کال کې هم د پخوا په څېر له پراخو مالي، اخلاقي فسادونو او شدیدو اختلافاتو سره مخ وه، خو د تېرو کلونو په پرتله یې په ۲۰۲۴م کال کې تر ټولو ډېر فسادونه او اختلافات په ډاګه شول. دې چارې د یادې شریرې جبهې رهبري دې ته اړ کړه، چې د ځان لپاره د اوړو پوزه کېږدي، خپل تللی او لیلام شوی حیثیت تر ممکنه بریده راوګرځوي او ورځ تر بلې له لاسه وتونکی حالت را کنټرول کړي، د همدې موخې لپاره یې ځینې له وارخطایي او تزلزله ډکې هڅې پیل کړې.
لومړی یې هڅه وکړه، چې ځانونه ته ستر – ستر نومونه او ټایټلونه وټاکي او داسې وښيي چې ګواکې دوی په یوه ستر چتر کې راټول دي او اختلافات نه لري، خو دې چارې نه تنها دا چې دوی ونه ژغورل، بلکې د دوی د پاشلتیا جریان یې لا چټک کړ؛ د مقاومت په نوم عالي شورا چې وړاندې یې جوړه کړې وه، وپاشل شوه، بیا یې له ډېرو ناندریو وروسته د افغانستان د نجات په نوم مجمع اعلان کړه، خو دې مجمع لا رسماً اعلان نه و کړی چې د انشعاب او پاشلتیا غږونه یې د ټولو تر غوږونو ورسېدل.
د خپلې ماتې د پټولو لپاره د دې لالهاندې او متزلزلې جبهې او د پردې تر شا د دوی د ملاتړو بله هڅه دا وه چې په افغانستان کې له ځینو شریرو عناصرو او فتنه ګرو سره لاس یو کړي، په ملکي ځایونو او اهدافو کې چاودنې وکړي او په دې ډول د خلکو په منځ کې وېره ډېره کړي، دوی په همدې موخه څو دا ډول چاودنې هم وکړې، چې وروستۍ هغه یې څو ورځې وړاندې په کابل کې د شیخ زاید روغتون مخې ته د ملکيانو په منځ کې چاودنه وه، خو دا تکتیک او هڅه یې ځکه ناکامه ده، چې له یوې خوا د دا ډول تخریبي کړنو مخه تر ډېره نیول شوې ده او له بلې خوا عام خلک د دوی په دې ټولو لوبو پوه دي او د دوی پر وړاندې یې مخالفت او نفرت لا پسې ډېرېږي.
وروستۍ، کمزورې او اسانه هڅه یې دا ده، چې په بهر کې د امریکا، برېتانیا، اسرائیل او نورو غربي او اسلام ضد کړیو او استخباراتي ادارو له خوا تمویلېدونکو رسنیو په مټ، د طالبانو او په افغانستان کې د شته واقعیتونو پر خلاف پراخ منفي تبلیغات وکړي، دا تبلیغات دومره ترې ډېر شوي، چې تر مبالغې هم واوښتل، هیڅ عاقل او هوښیار انسان که بهر یا هم په افغانستان کې دننه اوسېږي، دا خیالي او دروغجن ارقام او تبلیغات نه تنها دا چې نه مني، بلکې په فعالیتونو یې تمسخر او ملنډې هم وهي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.