د صنعت او سوداګرۍ وزارت په یوه خبرپاڼه کې ویلی، چې د دغه وزارت سرپرست نورالدین عزیزي نن پنجشنبه له تشبثاتو سکتور څخه د ملاتړ او پیاوړتیا په موخه له ۱۵ ملي او نړیوالو مؤسسو سره د همکارۍ هوکړه لیکونه لاسلیک کړي.
د خبرپاڼې له مخې، ټاکل شوې دغه ۱۵ مؤسسې به د څه باندې ۱۲ میلیونه امریکایي ډالرو په ارزښت پراختایي او ښوونیزې پروژې په تېره بیا د کار زېږولو، پرمختګ، په هېواد کې د غالیو صنعت د ودې، د لاسي صنایعو د پرمختګ، د وړو او منځنیو صنعتونو په لار کې د شته خنډونو د پېژندنې، د کورنیو لبنیاتو، سبزیجاتو او نورو اړتیا وړ توکو د تولید او پروسيس په برخه کې اړمنو کورنیو ته د روزنې او هغوی ته د اړتیا وړ وسایلو د برابرولو او بسته بندۍ په برخه کې روزنه او مالي سواد، د بستې اړوند ماشینونو اخیستنې او تجهیز او له هغې څخه د یوه برانډ جوړولو په برخه کې پلې کړي او د اتو تنو وړو او منځنیو متشبثینو لپاره د سولري سیستم جوړونه او نصب او په ټوله کې به په ۱۶ ولایتونو کې د تشبثاتو په برخه کې دغه پروژې پلې کړي.
د یادونې وړ ده، چې له دغه پروژو څخه به ۷۶۷۳ تنه په کابل، پکتیا، پکتیکا، خوست، بلخ، کندهار، لوګر، کندوز، بغلان، بدخشان، بادغیس، فاریاب، جوزجان، ننګرهار، تخار او بامیان ولایتونو کې ګټه واخلي.