لیکوال: اېمل پښتون
سکای نیوز د دوو بریتانوي ګرځندوی شرکتونو د مسوولینو له قوله راپور ورکړی، چې افغانستان ته د سیلانیانو د تګ غوښتنې ډیرې شوې دي.
دا په داسې حال کې ده، چې د بریتانیا د بهرنیو چارو وزارت په دې وروستیو کې د دغه هېواد وګړو ته افغانستان ته د سفر کولو په اړه خبرداری ورکړی و.
د «اګینسټ دي کومپاس» د مسافرتي شرکت بنسټګر جووان تورس وايي، چې په ۲۰۲۳ کال کې یې افغانستان ته یوازې درې ګرځندویانو سفرونه کړي وو، خو د روان کال په پیل کې دا شمېر دوه برابره شوی دی.
هغه زیاته کړه چې پخوا به ګرځندویانو سوریې او عراق ته ترجیح ورکوله، خو د منځني ختیځ وضعیت ته په کتو ښايي افغانستان ډېر ژر زموږ د ګرځندویې ټکټونو تر ټولو ډیر پلورونکی ځای شي. بلخوا د «انټميډ بورډر» شرکت چې په زړه پورې او د لاسرسي نه وړ ځايونو ته تګ راتګ کوي هم ادعا کوي، چې افغانستان ته د سيلانيانو د تګ غوښتنې زیاتې شوې دي.
افغانستان ته د بهرنیو سیلانیانو پام ور اوښتی او یاد هېواد کې سیاحت مخ په زیاتېدو دی. خبر زیاتوي چې د امارت له بیا واکمنېدو وروسته ډېرو سیاحتي شرکتونو افغانستان ته د سفر ټکټونه بند کړل؛ خو اوس د خپلو حکومتونو له اخطارونو سره، سره افغانستان ته د تګ له پاره خلک راجلبوي.
افغانستان له داسې طبعي ښکلاوو څخه برخمن هېواد دی، چې ساری یې نه لیدل کېږي، د افغانستان تاريخي عجايب د نړۍ خلک په حيرت کې اچوي، د امن او ډاډ په راتلو سره، ډیری بهرني سیلبین یاد هېواد ته جذب او په پوره ذهني سکون سره، د افغانستان په لر او بر کې له تاریخي عجایبو او غرایبو څخه لیدنه و کتنه کوي.
خپاره شوي معلومات ښيي، چې افغانستان په دې وروستیو کې د بهرنیو سیلانیانو د جذب په مرکز بدل شوی دی.
تېره میاشت یو بهرنی سیلبین له کابل څخه غزني ولایت ته د وردګو ولایت په لاره، د بايسکل په واسطه ولاړ، په لاره کې یې له تاریخي ځایونو، د جنګ له پاتې شونو او په مرمیو له لګېدلو کورونو څخه لیدنه هم وکړه، په هر کلي کې یې له عامو وګړو سره مجلسونه او لیدنې وکړې او د دوی له برخورد څخه خورا خوښن و، دا هغه لاره وه، چې د تېر حکومت په وخت کې په پُل صراط سره مشهوره وه، چې له ټانګ، توپ او طيارو سره یې چاته پرې د تګ اجازه نه ورکوله، خو اوس يو بهرنی سیلبین د بايسکل په واسطه تګ او راتګ پرې کوي.
د اسلامي امارت په راتګ سره په ټول هېواد کې امن قایم دی، داخلي او بهرني سیلبین په پوره ډاډ او اطمینان سره، د هېواد له ټولو برخو څخه لیدنه او کتنه کولی شي.
تمه ده چې په راتلونکي کې د سیاحت ځايونه زیات، د سیلبینو لپاره آسانتياوې برابرې او سیلبین په پراخه کچه د امن کور افغانستان ته راجذب شي.