یادؤنه: په هندوکش غږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکش غږ توافق ورسره شرط نه دی.
د تېر په څېر بیا يوې نوي ډلې له هېواده بهر د فعالیت او موجوديت اعلان وکړ، په اعلان شوې مجمع کې د لسګونه داسې ګوندنو، احزابو، مدني فعالانو او بېلابیلو ډلو منفورو مشرانو شتون درلود، چې تيرې څو لسیزې د افغانستان په کورنیو جګړو کې لاس لري، دوی پر افغانستان د امریکايي یرغل زمینه برابرونکي او د هغوی ملګري وو.
په تکراري توګه د شر او فساد ډلو شمېر لسګونه ته رسېدونکی ده، دوی تر يو او بل نامه لاندې د طالبانو په خلاف خیالي جوړښتونه رامنځته کوي؛ ددې ډلو په تشکیل کې داسې غړي هم دي، چې د څو نورو ډلو او استخباراتي سازمانونو غړیتوب هم لري.
د تازه اعلان شوې مجمع ډېری غړي په خپل منځ کې، د تېرو دریو کلنو پر مهال په انلاين ناستو کې د طالبانو خلاف يو ګډ دريځ ته نه دي رسېدلي، دوی په تېرو دریو کلنو کې يو او بل د پخوانیو اختلافاتو له امله سره وښکنځل او په خپل منځ کې یې، د شخصي ګټو پر بنسټ د بې ګناه افغانانو د وژنې تورونه پوري کړل. په دوی کې داسې اشخاص هم شتون لري، چې تر دې دمه په افغانستان کې د طالبانو په خلاف د مخالفت پر لارو چارو لا هم څرګند نظر نه لري.
عبدالرشید دوستم د طالبانو په وړاندې د نظامي جګړې پلوي کوي، خو عبدالرب الرسول سیاف د همدې نوي مجمع د اعلان پر مهال د سولې او خبرو اترو لاره غوره بلله، محمد محقق په يو بل کنفرانس کې د طالبانو د وزیرانو صفتونه کړي، عطا محمد نور پر صلاح الدین رباني او احمد مسعود څو ځلې د طالبانو خلاف د مبارزې ترسره کولو پر ډول او نوعیت نيوکې کړې دي، له دې سره عمر داودزي په څو ځلې او تېر کال له بي بي سي راډيو سره په يوه مرکه کې واضح وويل، چې د طالبانو خلاف د نظامي مبارزې او مخالفت پلوي نه کوي، کريم خليلي هم د داودزي په نظر دی.
د يونس قانوني، سرور دانش، تادين خان، شاه جهان، مدبر، شفق او دې ته ورته نورو بيا د طالبانو په خلاف دريځ پوره نه دی روښانه، لا څرګنده نه ده چې دوی د کومې موخې او په څه ډول د طالبانو خلاف مبارزه او د مخالف سنګر نيونې لپاره تبارز کوي. له دې ټولو داسې ښکاري، چې د شر او فساد د نورو ډلو په شان به وروستۍ اعلان شوې مجمع هم تجرید او د مبارزې لپاره د يو ګډ ميکانيزم په رامنځته کولو بريالۍ نه شي.
د نوي مجمع له اعلان څخه څرګندېږي، چې د مطرح جهت په ډول، د امريکا نوي ولسمشر ډونالډ ټرمپ ته د طالبانو په خلاف د يوې داسې ټاکنې د افشن ټاکلو په موخه هڅه کوي؛ داسې چې که چيرې د افغانستان په تړاو په راتلونکې کې کومه پرېکړه کېږي، اساسي ټاکونکي به یې دوی وي، خو که څوک د دغه منفورو سیاسیونو تېر ته ځیر شي، نو د دوحې تړون کې د بین الأفغاني مذاکراتو په ناکامۍ کې هم دوی لاس درلود او هغه مهال هم د امريکا د ولسمشرۍ چارې ټرمپ پر مخ وړلې؛ يعنې دوی ټرمپ ته په تېر کې هم امتحان ورکړی ده.
د ورته ډلو د ناکامۍ علتونه څرګند دي؛ د طالبانو په خلاف د شر او فساد ډلو غړي د خپلو شخصي ګټو او موخو لپاره په يو او بل نامه سره غونډېږي، خو دوی د يو او بل د مبارزې پر نوعیت او سنګر نيونې نیوکې کوي؛ په پايله کې دوی هيڅ ډول توافق او يو دريځ ته نه رسېږي او ډلې یې له ناکامۍ سره مخ کېږي.
له دې سره يوه مهمه نکته بيا دا ده، چې دوی تيرې دوې لسیزې د خپلو موخو لپاره پر افغان ولس سخت ظلم ترسره کړي، محلي حکومتولۍ او د قدرت جزیرې يې رامنځته کړې وې، په ټوله کې يې حکومت د يو سهامي شرکت بڼه خپله کړې وه؛ ولس په هيڅ ډول د دوی بيا ځلې واکمنۍ او تورو ورځو ته ورتګ نه غواړي.