د ترکیې پوځ اعلان کړی چې اته تنه سرتېري یې د عراق په شمال کې د لټون د عملیاتو پر مهال د میتان ګازو د چاودنې له امله وژل شوي دي.
د ترکیې دفاع وزارت وايي، یاد سرتېري د هغو عملیاتو پر مهال وژل شوي چې موخه یې د عراق د غرنيو سيمو په يوه پېچلې سيمه کې د ۲۰۲۲ کال په پسرلي کې د یو وژل شوي ترکي سرتېري موندل وو.
سرچينې ویلي، سرتېري د میتان ګاز له امله بې هوښه او مړه شوي؛ خو تر دې دمه یې نه ده روښانه کړې، چې دا زهرجن ګاز څنګه او ولې په سیمه کې خپور شوی.
یاده پېښه په داسې حال کې شوې چې ترکیه د کردستان د کارګر ګوند (PKK) سره د اوږدې جګړې د پای ته رسولو او د سولې د احتمالي خبرو اترو هڅه کوي او ولسمشر اردوغان ويلي چې ياد ګوند به ډېر ژر خپلې وسلې تسليم کړي.