د ریاست الوزراء اقتصادي معاونيت په يوه خبرپاڼه کې وايي چې د اقتصادي مرستيال ملا عبدالغني برادر اخوند په حضور کې نن پنجشنبه د میزان میاشتې په ۱۹مه د کانونو او پټرولیم وزارت او ازبکستاني کمپنۍ ترمنځ د شاوخوا یو میلیارد ډالرو په پانګونې سره د طوطي میدان ګازو د اکتشاف او استخراج لس کلن تړون لاسلیک شو.
د خبرپاڼې پر بنسټ د دغه تړون له مخې به قراردادي کمپنۍ په لومړي کال ۱۰۰ میلیون ډالره او د لسو کلونو په جریان کې یو میلیارد ډالره پانګونه کوي، چې له استخراج شوو ګازو څخه په لومړیو دوو کلونو کې ۱۰۰میګاواټه ګازي برېښنا هم تولیدوي.
خبرپاڼه همدا راز ډېروي چې د فاریاب ولایت د طوطي ميدان ګازو زېرمې شاوخوا اووه زره کيلومټره مربع مساحت لري چې د استخراج په پیل سره به یې تر ډېره حده د هېواد د ګازو اړتیاوې پوره او زرګونو هېوادوالو ته به په مستقیم او غیر مستقیم ډول د کار زمینه برابره کړي.
د يادونې وړ ده چې پرون د سرپل ولايت د تېلو ۲۳ مه څاه هم د افچين کمپنۍ له لوري پرانستل شوه.