د فکر لارویان نه مري، ددې لامل د فکر شتون دی؛ د اسلامي نړۍ لوی عالم، مفکر، ټولنپوه او تاریخ امام عبدالرحمن ابن خلدون رحمه الله وایي: انسان ته شرف په فکر حاصل دی، یا په بل عبارت انسانان چې د اشرف المخلوقات فضلیت ته رسېدلی دا د فکر برکت دی، که د فکر نعمت له انسان څخه حذف شي نو بیا یې د څاریو سره توپیر نه کېږي، د انسان موخه انساني رسالت دی که څوک په دې پوه نه شي بیا خو د ځای حرص، د خوړو غریضه او شهواني غریضه حیوانات هم لري.
امام خلدون رحمه الله وایي کله چې انسان خپل فکر په عمل کې پلي کړي نو انسان د کمال درجې ته رسېږي؛ بیا چې هم انساني فکر د سړي په سر کې وي او هم اسلامي فکر ولري نو بیا خو داسې انسانان د انبیاؤ کرامو د نیابت او وراثت په لاره روان وي او دا انسانان ډېر کم وي؛ خدای جل جلاله د امت د ویښتابه اذان د ډېرو نادرو انسانانو په برخه کوي او دغه رسالت ته ډېر کم خلک خاص شوي وي.
د خدای تعالی په دې قول کې چې فرمايي: كُنتُمۡ خَيۡرَ أُمَّةٍ أُخۡرِجَتۡ لِلنَّاسِ تَأۡمُرُونَ بِٱلۡمَعۡرُوفِ وَتَنۡهَوۡنَ عَنِ ٱلۡمُنكَرِ وَتُؤۡمِنُونَ بِٱلله (آل عمران: ١١٠).ژباړه: اوس په نړۍ کې هغه غوره ډله تاسي ياست چې د انسانانو د لارښووني او اصلاح لپاره منځ ته راوړل شوې ده، تاسي د نېکۍ امر كوئ او له بديو منع؛ او پر الله ايمان لرئ.
سمه ده چې باطل پرستان به د ویښتابه لارویان شهیدان کړي مګر د هغوی فکر نه شي وژلای او د هغوی فکر به لکونه او میلیونونه انسان له درانه خوبه را ویښ کړي؛ لکه د حماس د سیاسي دفتر رئیس ارواښاد هنیه چې امت وخوځاوه.
د داسې خلکو مرګ د شهادت مرګ دی، او شهیدان نه مري الله تعالی جل جلاله فرمايي: وَلَا تَقُولُواْ لِمَن يُقۡتَلُ فِي سَبِيلِ ٱللَّهِ أَمۡوَٰتُۢۚ بَلۡ أَحۡيَآءࣱ وَلَٰكِن لَّا تَشۡعُرُونَ. (سورة البقره: ١٥٤).ژباړه: هغه کسان چې د خدای تعالی په لاره کې قرباني کېږي هغوی مړه مه بولئ، بلکې هغوی ژوندي دي خو تاسې یې نه وینئ.
د شهید لپاره کفن او غسل په همدې نشته چې له ژوندي انسان جامې ایستل د هغه توهین دی؛ هنیه رحمه الله لاړ مګر د هغه فکر به دا شیندلی امت راټول کړي او ترمنځ به مو دا شلیدلي واټنونه وګنډي.
د اسلامي نړۍ اکثرو مشرانو سیاسي مصلحتونه یوې ډډې ته کړل پر هنیه رحمه الله برید یې د اسرائیلو شرموونکی عمل بللی.
ترکیه چې د ناټو غړی هېواد دی دا برید شرمونکی برید وباله، ایران چې له سلګونو بندیزونو سره مخ دی بیا یې هم وویل چې د هنیه قاتلانو ته به داسې سزاء ورکړي چې په دې قتل به یې پښېمانه کړي.
افغانستان، سوریه، عراق، قطر، مصر او ګڼو اسلامي هېوادونو د غربي بدمعاشانو خلاف په یو موقف کې ودرېدل.
نو له همدې ښکاري چې د هنیه رحمه الله فکر د اسلامي نړۍ لپاره لکه تار او ستن دا اُمت به پیوند کړي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.