د هر مسلمان لپاره یوه پوښتنه چې ځواب ته رسېدل یې خورا مهم دي، دا ده: چې څنګه ټول کفار او نړیوال استکبار د بغاوت د هغې جبهې ملاتړ کوي، کومه چې خپل ځان مسلمان او د شهیدانو د آرمان حامل ګڼي؟ ستاینه یې کوي او د همکارۍ ژمنې ورکوي، دا پیښې ظاهراً د قرآن له منطق سره په ټکر کې ښکاري، ولې؟ قرآن د دې پوښتنې ځواب ورکوي چې لاندې به ورته اشاره وشي، تاسو ورباندې غور ورکړئ.
د مسلمان خوی د اصلاح غوښتنه وي، ځکه چې د هغه تړاو له داسې دین سره دی چې ټول د خیر غوښتونکی دی، نه یوازې د مسلمانانو لپاره، بلکې د ټولې نړۍ لپاره خیر پکې نغښتی.
قرآن لکه څرنګه چې د الهي حکمت او پوهې پر اساس د مسلمانانو خاصیت بیانوي، د هغوی د دښمنانو باطني طبیعت هم بیانوي، د مسلمانانو دښمنان یهود، نصاری او مشركین دي.
ریښتینو مسلمانانو ته د قرآن کریم خطاب دی چې یهود او نصاری هیڅکله له تاسو څخه نه راضي کیږي؛ که تاسو هغه اسلام ومنئ چې الله تعالی په خپل قرآن کې او د خپل محبوب پیغمبر محمد صلیالله علیه وسلم په سیرت کې وضع کړی دی، نو هیڅکله به یهود او نصاری له تاسو څخه راضي نه شي.
البته یوازې په یوه حالت کې دا دښمنان له تاسو راضي کېږي او هغه دا دی چې تاسو ځان د دوی له دین، عقیدې او ایډیالوژي سره برابر کړئ؛ لکه څنګه چې الله تعالی د سورة بقرې په ۱۱۹ آیت کې وايي:«وَلَن تَرۡضَىٰ عَنكَ ٱلۡيَهُودُ وَلَا ٱلنَّصَٰرَىٰ حَتَّىٰ تَتَّبِعَ مِلَّتَهُمۡۗ» (یعني یهودیان او مسیحیان به هیڅکله له تاسو راضي نه شي، تر څو چې د دوی دین او عقیده ونه منئ).
قرآن کریم وايي چې نه یوازې دا دښمنان به له تاسو راضي نه شي، بلکې همېشه به له تاسو سره په جګړه کې وي، لکه څرنګه چې د بقرې سورة په ۲۱۷ ایت کې راغلي:«وَلَا يَزَالُونَ يُقَاتِلُونَكُمْ حَتَّىٰ يَرُدُّوكُمْ عَنْ دِينِكُمْ» (یعني کافران به تل له تاسو سره جګړه کوي تر څو تاسو له خپل دین څخه راوګرځوي).
د قتال لفظ چې په پورته آیت کې کارول شوی دی، د جد و جهد او جهاد له مادې څخه نه دی چې د فکري جګړې او سړې جګړې په معنی وکارول شي، بلکې قتال د تن په تن، مخامخ، ګرمې او وسله والې جګړې معنی لري.
اوس اصلي پوښتنه او ځواب یې واضح کېږي، دا چې ولې کفار او نړیوال استکبار د افغانستان له بغاوت جبهې څخه خوشحال دي؟ ولې یهود او نصاری له دې باغي ډلې سره وسله والې جګړې ته نه ځي؟!
هو، ځواب روښانه دی: «حَتَّىٰ تَتَّبِعَ مِلَّتَهُمۡۗ» ځکه چې د مقاومت جبهه خپل ځان مسلمان ګڼي، خو د تفکر او ایډیالوژۍ له مخې له غرب او نړیوال کفر سره موافق او تابع دي؛ که داسې نه وای د اسلامي نظام پر ضد به نه راپاڅېدل.
نړیوال کفر درک کړې چې د بغاوت جبهه له دوی سره ورته والی او تړاو لري، ځکه یې په تشو او بې بنسټه ژمنو سره خپلو شومو پلانونو ته د رسېدلو لپاره وسیله او آله ګرځولي دي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.