څه باندې درې کاله کېږي، چې طالبان پر افغانستان واکمن دي، په دې مودې کې تر بېلابیلو نومونو لاندې د طالبانو په خلاف د شر او فساد ډلې او ټپلې رامنځ ته شوې دي، چې اکثره یې خیالي دي، انلاین فعالیت لري او د تبلیغاتو په حد کې پاتې شوې دي. د دغه تبلیغاتي ادرسونو په لړ کې، د ښځو خیالي ډلې هم ایجاد شوې دي، چې له منځه یې یوه هم د مقاومت جبهې د ښځو شوری ده.
په تېرو دريو کلنو کې د طالبانو خلاف د مقاومت جبهې د ښځو شوری وخت نا وخت د طالبانو په خلاف له نا معلوم ځای څخه اعلاميې خپرې کړې دي او د ځينو پرېکړو په ضد یې مطبوعاتي سنګر نيونې کړې دي؛ خو پوښتنه دا ده چې په دغه شوری کې شته ښځې څوک دي او له کوم ځايه یې رهبري کېږي!؟
تر دې مهاله د شر او فساد ډلې د ښځو شوری د تشکیل، رهبرۍ، اهدافو او دفتر په اړه هیڅ راز معلومات نشته، دغه مبهم ادرس د هېواد په داخل او بهر کې څو تنې پروژه یي ښځې هڅوي، چې په پټو مخونو څو ناسم او تبلیغاتي کلیپونه جوړ کړي، بیا ادعا کوي چې دغه کلیپونه د افغانستان د نیم نفوس په استازولۍ خپروي.
د دغه شوری له مبهمو تبلیغاتي فعالیتونو داسې تحلیل کېږي، چې د مقاومت په نوم د ښځو شوری د احمد مسعود د کورنۍ خیالي شوری ده، چې بنسټیز هدف یې له طالبانو سره د مخالفت په نوم له غرب څخه ملاتړ او پیسې ترلاسه کول دي.
د شر او فساد ډله د ښځو د خیالي شوری په لرلو داسې څرګندوي، چې په هېواد کې د ښځو ټولو حقونو ته قايل دي، په داسې حال کې چې همدا د شر او فساد عاملینو ښځې ابزار کړې وې/ دي، د ښځو چارو وزارت، امن خونې، مدني خوځښتونه، د ښځو لپاره د پارلمان څوکۍ، د واليانو مرستیالۍ او پر بېلابيلو پوسټونو نمايشي ګمارنې او اوس بیا اعتراضیه حرکتونه تنها د استفادې لپاره وو/ دي.
د شر او فساد مقاومت شوری چې تر یوې کورنۍ پورې منحصره شوری ده، له فعالیتونو یې داسې پايله لاس ته راځي، چې د دوی ټولې هڅې د پروژو په توسط د پيسو ترلاسه کول دي، نه د ښځو حقونه او نه هم د افغانانو سوکالي او نېکمرغي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.