افغانستان د څلوېښت کلنې جګړې سخته او اوږده لاره، له بې شمېره ازمایښتونو، کړاوونو او ترخو تجربو سره وهلې ده. دا ولس اوس د پوخوالي او درایت عمر ته رسېدلی، نه یې په پردیو پورې د تړلیو او مطلب آشنا علماوو خبرې کمزوری او لړزولای شي، نه یې د جبهاتو او تش په نوم مقاومتونو دوکې او دسیسې کمرنګه او د یوې بلې بې ثباتۍ کندې ته ور ټېل وهلای شي.
له شک پرته دا جغرافیه په تېرو څلوېښتو کلونو کې له ډول ډول سیاسي بهیرونو، احزابو او تشکیلاتو سره اوسېدلې. ولس دا ټول جریانونه له ریښې څخه پېژني، د هغوی له فکري جوړښت، ذهني تګلارو او سیاسي تمایلاتو څخه خبر دي؛ ځکه خو یې نیمګړتیاوې، فکري ناروغۍ او حتی انحرافات ترې پټ او پناه نه دي.
د دې اوږدې، پېچلې او له تجربو د ډکې لارې له وهلو وروسته، دا ملت نور هېڅکله ځان د ناسالمو، ګډوډو او بې ریښې جریانونو د لوبو وسیله نه ګرځوي، خپل کور، ټاټوبی او د ولس آرامي، د علم پلورونکو علماوو په بې معنی او بې باوره ویناوو نه پلوري.
نننی افغانستان په سیمه کې د یوه خوندي، باثباته او د سیاسي – اقتصادي استقرار درلودونکي هېواد په توګه راڅرګند شوی دی. هغه آرامي او سوکالي چې هېواد نن ترې برخمن دی، د جګړو او شخړو د ټولو کلونو په پرتله بې سارې ده او دا هر څه د سرتاسري امنیت د ټینګښت په پایله کې لاس ته راغلي دي.
له دې هر څه سره سره، په مقاومت جبهې پورې د تړلو علماوو او تښتېدلیو تشې، تبلیغاتي او رسنیزې خبرې د فکر کولو او تأمل وړ دي، دا چې څه ډول د دوکې پر لاره ګام ږدي او په شعوري ډول هڅه کوي هغه څه سپین وښيي چې تر هغه د بل تور څه تصور نشي کېدای! دا کار د هغه چا مثال لري چې له بارانه تېښتي او تر ناوې لاندې درېږي.
خو له نېکه مرغه، د اوسني حکومت د سیاسي او اقتصادي لید د پیاوړتیا، د خپلواکۍ د ټینګښت او د نسبي ثبات په رامنځته کېدو سربېره، د افغانستان شریف ولس هم فکري ثبات او رواني آرامۍ ته رسېدلی دی او د اوسني وضعیت د مثبتو اړخونو ستاینه کوي. د اوسني حالت په اړه دا ولسي درک او قضاوت د کلونو ازمیښتونو، ناکامیو او تجربو پایله ده چې د حقیقت د منلو او حق په جانب اعتراف مرحلې ته رسېدلی دی.
بیا څنګه امکان لري چې دا ملت د داسې عالمنما او نمایشي کسانو په بې ریښې، بې روحه او عالمنما خبرو ولړزېږي او د خپل آرام ژوند په کور کې د وېرې او اضطراب لمبې بلې کړي؟ دا یوازې یو خام فکر، خامه انګېرنه او توره مفکوره ده چې هېڅکله به د حقیقت جامه وانه غوندي.
نن سبا د دې هېواد هر وګړی په رڼو سترګو او ویښ وجدان مثبت بدلونونه ویني، اوسنی وضعیت د تېر وخت له تورو، نا امنو او ګډوډو شرایطو سره پرتله کوي او په پایله کې په عادلانه او منصفانه ډول د دې هر څه ستاینه کوي. د هغو کسانو خبرې چې د دیني عالم په جامه کې، له لرې او بهر څخه د دسیسو جوړولو په لټه کې دي، په کلکه یې ردوي او مخونه یې ور توروي.
دا ټول بدلونونه او پرمختګونه د اوسني حکومت د دوامدارو، منظمو او متمرکزو هڅو پایله ده چې د هېواد د آبادۍ، ثبات او اقتصادي ودې لپاره یې په تېرو څو کلونو کې ترسره کړې دي، ولس د دې هر څه شاهد دی او په خپلو سترګو یې ویني.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.