د ریاستالوزراء اقتصادي مرستیال ملا عبدالغني برادر اخوند د ملت سټیل اوسپنې ویلې کولو کارخونې د گول سیخونو د دویم او اوسپنیزو گاډرو د تولید درېیم فازونه پرانیستل.
نوموړي د پرانیستې په دغه مراسمو کې وویل، د صنعت سکتور په پرمختگ سره به په هېواد کې اقتصادي پراختیا رامنځته شي.
همدارنگه نوموړي د کارخونو مسوولینو ته ډاډ ورکړ، چې حکومت صنعتي کارخونو ته د دایمي برېښنا چمتو کولو لپاره هڅې کوي.: «په همدې موخه د کورنۍ برېښنا د تولید کچې زیاتولو په موخه پر نورو پروژو سربېره له خصوصي سکتور سره د کابل په سروبي ولسوالۍ کې د شاوخوا ۲۳ مېګاواټه تولیدي برېښنا قرارداد لاسلیک کړ.
اسلامي امارت په کور دننه د خامو توکو چمتو کولو په موخه د هرات د اوسپنې کان څلور بلاکونه د داوطلبۍ له لارې کورنیو او بهرنیو شرکتونو ته په قرارداد ورکړل، څو په راتلونکي کې د اوسپنې ویلې کولو فابریکې د خامو موادو له کمښت سره مخ نه شي.»ښاغلي برادر وویل، اسلامي امارت پر هغو اوسپنیزو توکو تعرفه لوړه کړې ده چې په کور دننه تولیدېږي او د هېوادوالو اړتیاوې پوره کولی شي.
نوموړي له ټولو دولتي ادارو او هېوادوالو وغوښتل، چې د خپلو اړتیاوو پوره کولو پر مهال له کورنیو تولیداتو گټه واخلي، که څه هم کیفیت یې د بهرنیو تولیداتو په پرتله له لس تر پنځلس سلنې ټیټ وي.:« له صنعت کارانو او پانگهوالو غواړو چې د هېواد دننه په داسې مهمو سکتورونو کې لکه دا نن یې چې پرانیسته کوو، پانگونه وکړي او له دې لارې د هېواد په پرمختگ او ځان بسیاینه کې خپل مسوولیت اداء کړي.»
د ملت سټیل اوسپنې ویلې کولو فابریکې په دویم او درېیم فازونو کې ۵۰ مېلیون ډالره پانگونه شوې، چې په ورځني ډول د اوسپنې پټلۍ خطونو، گول سیخ او گاډرو سلگونه ټنه تولید ظرفیت لري او شاوخوا ۲۰۰۰ کسانو ته پکې کاري زمینه برابره شوې.