د چاپېریال ساتنې ملي ادارې خبر ورکړی، چې د دې ادارې عمومي رئیس مولوي مطیع الحق خالص د یو پلاوي په مشرۍ نن (سهشنبه، د غبرګولي ۱۳مه) د واورین پړانګ د ساتنې لپاره د رهبرۍ کمیټې په نهمه سیمهییزه غونډه (GSLEP) کې د ګډون په پار قرغیزستان ته په سفر تللی.
د خبر له مخې، ښاغلي خالص ویلي، چې پر هېواد د ا.ا له بیا ځلې واکمنیدو را وروسته دا لومړی ځل دی چې د ا.ا پلاوی په یاده سمیه يیزه غونډه کې ګډون کوي.
نوموړي زیاته کړې چې ياده غونډه د ۲۰۲۵ کال د جون په ۵ او ۶ مه نېټه په قرغیزستان هېواد کې جوړېږي او د هغو دولسو هېوادونو چې د واورین پړانګ طبيعي استوګنځایونه لري، لوړپوړي چارواکي، مسلکي کارپوهان او استازي ګډون کوي.
ټاکل شوې ده، چې د افغان پلاوی به دې غونډه کې د بدخشان او نورستان په غرنیو سیمو کې د واورین پړانګ د ساتنې لپاره د ملي هڅو په اړه معلومات وړاندې کړي او همدارنګه هغه ستونزې او ننګونې چې په یاده برخه کې موجودې دي له اړونده هېوادونو سره شریکې کړي.