د ۲۰۲۱م کال په اګسټ میاشت کې د جمهوري رژیم له پرځېدو سره سم، لوړ پوړي چارواکي او واکداران له اشغالګرو وړاندې له هېواده ووتل او پښې یې سپکې کړې، د تېښتې له ورځې پیل، بیا تر اوسه چې شاوخوا څلور کاله یې په پوره کېدو دي، پخوانیو چارواکو په بېلابېلو نومونو، په بهرنیو هېوادونو کې شوراګانې، ډلې، تبعیدي ولسمشرۍ، جبهې او جوړښتونه رامنځ ته کړي دي، چې ټول یې په یوه خوله د سرپرست حکومت په وړاندې د مبارزې ادعا لري، خو د واقعي هڅو او حل په ځای د داخلي سیالیو، نمایشاتو، اختلافاتو او دروغجنو ادعاوو او شعارونو قربانيان دي.
دا چې یادې جوړې شوې ډلې او جوړښتونه د هېواد په منځ کې هیڅ راز ولسي ملاتړ، انسجام او فعالیتونه نه لري، یو په بل پسې د سقوط پر پوله ودرېدلې او لا درېږي. د دوی په منځ کې شدیدو اختلافاتو، شخړو، تورونو، غلاوو، سیالیو او ولس ته دروغجنو فیسبوکي وعدو د دوی د یوه پراخ او ستراتیژیک پلان، ستراتیژۍ او ثابت مسیر ځای ونیو.
شاوخوا څلور کاله کېږي چې د مخالفو ډلو غړي او مشران په خپلو مرکو، مجازي ناستو او فیسبوکي اعلامیو کې د سرپرست حکومت د له منځه وړلو، په وړاندې یې د مبارزې او سقوط ژمنې ورکوي، بلکې ځینو خو یې فقط د څو میاشتو واکمنۍ وړاندوینې کولې او ځینو یې بیا تر اختر پورې ضرب الاجل ټاکه، خو دا ژمنې نه تنها چې پوره نه شوې، بلکې په ټولنیزو رسنیو کې د سیاسي ټوکو په څېر بدرګه کېږي.
سرپرست حکومت پر ټول هېواد کنټرول لري، ټولې ځانګړې ورځې او مراسم په امن فضا کې ترسره کېږي، مزاحمې ډلې حضور نه لري، په وړاندې یې د هېواد په داخل کې امنیتي ننګونې تقریباً د صفر کچې ته ټیټې شوې دي، ورځ تر بلې د نظام داخلي جوړښتونه قوي کوي او د سقوط هیڅ نښه یې نه ده لیدل شوې، خو کله چې د مخالفو ډلو انلاین مشران د افغانستان وضعیت ترینګلی تعریفوي او د سقوط د نږدې والي افواه بدرګه کوي، د ټولنیزو رسنیو د فعالانو له خوا رشخند کېږي او ټول شور یې تر فیسبوکي اعلامیو منحصر بلل کېږي.
د مخالفو ډلو مشران له سترو ادعاوو سره دغه ډګر ته راوتي، خو نه تنها چې په تېرو څلورو کلونو کې یې سرپرست حکومت ته حتی مزاحمت لا هم ایجاد نه کړ، بلکې سرپرست حکومت لا نور توانېدلی چې د نظام د ننه جوړښتونه قوي او لا مستحکم کړي، بلکې د نړۍوال مشروعیت په لور یې ګامونه اخیستي او لا هم د تعاملاتو پر پراخېدو کار کوي.
مخالفینو د خپلې تورې ماضي د لرلو ترڅنګ، دا مهال بې لیدلوري او بې ګټې مخالفت ته مخه کړې، داسې مخالفت چې د فیسبوکي اعلامیو په حدودو کې ور منحصر دی؛ یو خوا د دوی دومره بې ثمره فیسبوکي مبارزه، بل خوا د ولس هغه نفرت، چې په شلو کلونو کې یې د فاسد جمهوریت د حاکمیت له کبله، د تورو څهرو سره پیدا کړی، هیڅکله به یې د شومو ارمانونو پوره کولو ته پرېنږدي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.