د اې بي سي نيوز رسنۍ د راپور له مخې، د امريکا د نیویارک ښار په هډسن سیند کې یوه سیاحتي چورلکه لوېدلې، چې له امله یې شپږ تنه مړه شوي.
سرچينه وايي، چې ياده پېښه پرون مازديګر مهال رامنځته شوې او قربانیان یې یوه هسپانوي کورنۍ ده چې درې ماشومان لري او یو خپله د چورلکې پیلوټ دی.
د دې هساپنوي کورنۍ مشر آګوستين اسکوبار نومېده او په هسپانيا کې د زيمنس په نوم د يوه شرکت د مدير په توګه یې دنده ترسره کوله.
د دغې پېښې په تړاو، د فدرال هوايي چلند ادارې ډېر جزئيات نه دي خپاره کړي؛ خو وايي چې یوه بیل ۲۰۶ ډوله چورلکه د هډسن په سیند کې نسکوره او ډوبه شوې، چې د پېښې علت موندلو څېړنې روانې دي.
ياده دې وي چې، له دې پېښې څو اوونۍ وړاندې هم يوه چورلکه د ايسټ ريور په نوم سيند کې لوېدلې او کسانو ته یې مرګ ژوبله اړولې وه.