د هرات ولایت سیمه ییز مسولین وایي، چې د بزګرانو ستونزو د حل په موخه په دغه ولایت کې ۱۹ کوچني چک ډیمونه (د اوبو د ذخیره کولو بندونه) جوړېږي چې د دوو چک ډیمونو کارونه تکمیل شوي او پاتې نورو چک ډیمونو باندې کار روان دی.د هرات د والي ویاند مولوي نثار احمد الیاس وایي، چې د یادو بندو په جوړېدو سره به د دغه ولایت د بزګرانو ستونزې تر ډېره حل شي.دا په داسې حال کې ده، چې څه موده وړاندې د لغمان ولایت مسولینو په دغه ولایت کې د پنځه چک ډیمونو د جوړولو خبر ورکړی و. د لغمان ولایت د کرنې، اوبو لګولو او مالدارۍ ریاست مسولین وایي، چې د لغمان ولایت په پنځو ولسوالیو (الینګار، الیشنګ، دولت شاه، قرغه یي او بادپښ) کې د پنځلس میلیونه افغانیو په ارزښت یو یو چک ډیم جوړېږي، چې عملاً یې چارې پیل شویدي.بلخوا د یادو ولایتونو سیمه ییز خلک او کروندګر د یادو پروژو په پیل خوښي څرګندوي او وایي، چې د یادو چېک ډېمونو په جوړېدو سره به یې زراعتي ځمکې، چې د اوبو له نشتون سره مخ وې، بېرته ښېرازه او د کښت لپاره برابرې شي.
د هرات سیمه ییز مسولین: په هرات کې ۱۹ کوچني چک ډېمونه جوړېږي
#image_title