د عامې روغتیا وزیر، مولوي نورجلال جلالي هند ته په خپل سفر کې د یاد هېواد د درملیزو فابریکو، صادرونکو شرکتونو او دودیزو درملو اتحادیو له مسئولینو سره کتلي.
د یاد وزارت ویاند، ډاکټر شرافت زمان وایي، چې دې کتنه کې افغانستان ته د معیاري درملو پر صادراتو، د قیمت او کیفیت برخې ته ځانګړې پاملرنې، په افغانستان کې پر پانګونې او ځینو نورو موضوعاتو خبرې شوې دي.
ښاغلي جلالي ویلي، چې افغانستان اوس مهال د درملو په برخه کې کافي منابعو ته لاسرسی لري، خو بازار ته په کم قیمت د باکیفیته درملو وړاندې کول یې لومړیتوب دی.
ورته مهال د هند د درملیزو اتحادیو مسئولینو د درملو د کیفیت او قیمت برخه کې ډاډ ورکړی او ویلي یې دي، چې په اوس وخت کې به د افغانستان مارکیټ کې د درملو هیڅ راز کمی نه را منځته کیږي.
هندي لوري ویلي، چې اوس مهال هم په کم قیمت باکیفیته درمل افغانستان ته صادروي او په دې برخه کې به له افغانانو سره هر ډول همکارۍ ته چمتو وي.