د افغانستان د بهرنیو چارو وزیر مولوي امیر خان متقي په متحده عربي اماراتو کې د هند د بهرنیو چارو وزارت له مرستیال ویکرم مصري سره لیدلي دي، په دغه لیدنه کې دواړو لوریو د بشري مرستو، دوه اړخیزو اړیکو او پرمختیايي پروژو په برخه کې هوکړې ته رسېدلي دي. د هند د بهرنیو چارو وزارت ویاند رندهیر جیسوال هم ویلي، چې په دې ناسته کې د دوه اړخیزو اړیکو، د سیمې پر امنیتي وضعیت او بشري مرستو هر اړخیزې خبرې اترې شوې دي.
هندوستان د افغانستان ستراتیژیک ملګری او نږدې هېواد دی. افغانستان او هندوستان د تېمور شاه او بیا وروسته د شاه زمان له دورې، له افغانستان سره نږدې اړیکې پالي. هر کله به چې د انګرېزانو او فرانسویانو لخوا پر هندوستان یرغلونه کېدل، نو د اُمید سترګې به یې افغانستان ته کږې وې؛ ځکه چې افغانستان د سترو امپراتوریو هدیره ده، غیور او قهرمان ملت لري.
له ډېري مودې وروسته بیا هم هندوستان، افغانستان د خپل سیاسي ثبات، ټیکاو، اقتصادي همکاریو او ښو اړیکو لپاره غوره افشن ګڼي او اولویت ورکوي.
له سلما بند برسېره د چابهار بندر د رغولو ښېګڼه به یې افغانان کله هم له یاده ونه وباسي. هندوستان هېواد ډېری وخت له افغانستان سره مرستې ته را دانګلي او د زېربنایي پروژو تر څنګ یې اقتصادي پروژې هم تطبیق کړي دي؛ هر کله چې به ګاونډیانو د افغانستان د ترانزیټ پر مخ خپلې دروازې وتړلې او غوښتل به یې چې تازه مېوه او ترکاري خوسا شي، نو هندوستان تازه مېوې او سبزیجات د هوایي دهلېز له لارې د هندوستان او سیمې د هېوادونو تر بازارونو رسول.
د اکانومیک ټایمز د راپور پر بنسټ، د مالي سیستم د عصري کولو په موخه هم هند د سرپرست حکومت مسولینو ته په ۱۴۰۱ هـ ل کال کې ډاډ ورکړی و.
همدا ډول یې هر کال افغان محصلینو ته لسګونه سکالرشيپونه تخصیص کړي او سلګونه ځوانانو د نوموړي هېواد په معتبرو پوهنتونو کې د لسانس، ماسټرۍ او دوکتورا تر کچې زده کړې کوي.
په نظامي برخه کې یې سلګونه ځوانان فارغ کړي، چې اوس مهال د دفاع او کورنیو چارو وزارتونو په مسلکي برخو کې د خدمت مصدر ګرځېدلي دي.
د چارو شنونکي په اوسني وخت کې دا ډول لیده او کاته د دواړو هېوادونو لپاره خورا ګټور ګڼي، ځکه چې له اقتصادي، سیاسي او امنیتي لحاظه افغانستان او هند خورا نږدې پاتې شوي دي او دغه لیدنې به یې نور هم نږدې کړي. د دغه اړیکو د لا ټینکښت په هدف څه موده وړاندې هند یو افغان ډیپلوماټ د ممبۍ ښار د جنرل قونسلګرۍ لپاره ومانه او رسماً یې په خپلو چارو پیل هم وکړ.
د چارو کارپوهان په اقتصادي، سیاسي او امنیتي برخو کې د هند او افغانستان اړتیاوې د لازم او ملزوم والې له مخې د هندوستان مرستې صادقانه او د دوه اړخیزو اړیکو د ټینګښت په برخه کې مهم بولي او له سرپرست حکومت غواړي، چې د دغه اړیکو د دوام لپاره اغېزمن ګامونه واخلي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.