هندوستان ټايمز راپور ورکړی، چې د روسیې ولسمشر ولادیمیر پوتین او نريندرا مودي، په نوي ډهلي کې د یوې ناستې پر مهال د اوکراین د سولې د هڅو او دوه اړخیزې سوداګرۍ پر پراختیا خبرې کړې دي.
مودي ټینګار کړی چې هېواد یې د اوکراین د سولې له هرې هیلې او هڅې ملاتړ کوي او پوتین هم د هند له لومړي وزیر څخه د دغه بحران د هوارولو په برخه کې د هڅو مننه کړې ده.
د پوتين په خبره، د هند له حکومت سره یې د اوکراین د وضعیت او هغو ګامونو په اړه خبرې کړي، چې روسیه یې د امریکا په ګډون له خپلو څو شریکانو سره د یوه احتمالي سولهییز حل لپاره ترسره کوي.
د روسیې ولسمشر همدا راز هند سره د اقتصادي همکاریو په پراختیا هم ټینګار کړی او ويلي یې دي، چې دواړه هېوادونه به په لوړو ټکنالوژیو، هوایي چلند، فضا، او مصنوعي ځیرکتیا په برخو کې ګډ کار پراخ کړي.