یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
په دې ورستیو کې د شر او فساد ډلې او د طالبانو د حکومت ضد کړۍ غواړي عامه اذهان را وپاروي یا خلکو ته تشویش واچوي، نو محض پوچ تبلیغات کوي.
په کېمپونو کې پراته د علم، پوهې او اسلامي فکر ضد عناصر چې ولس رټلي او هیڅ خبره یې دلته ځای نه نیسي یو ډول غواړي د افغانستان د تمامیت په ضد خوله خلاصه کړي.
دا ډله خلک د مختلفو سایټونو، خبري اژانسونو او خواله رسنیو تر شا ناست پروژیان دي.
اوس یې په کمپيوټر جوړه شوې جعلي نقشه فوټوشاپ کړې او د واخان سر یې د افغانستان له تنې غوڅ کړی او د پاکستان له نقشې سره یې یوځای کړې او بیا یې ورسره تبلیغاتو او رسنیز پوښښ ته زور ورکړی چې طالبان د یوې پټې معاملې په ترڅ کې د واخان دهلیز پاکستان ته ورکړی.
د واخان په کوریډور د 1402 کال په اواخرو کې کار پیل شو چې د خامه سړک د جوړولو چارې یې د طالبانو د کلیو او بیارغاونې وزارت له لوري ترسره کېږي او د سړک اساسي رغولو مسولیت یې د چین لخوا په غاړه اخیستل شوي.
په کابل کې د چین سفیر ژاوشینګ د کلیو او پراختیا سرپرست وزیر محمد یونس اخندزاده ته ډاډ ورکړی دی چې دوی به ددې سړک د اساسي رغولو چارې مخ ته یوسي.
واخان د افغانستان د غرور ککرۍ ده ترڅو چې د یو افغان په تنې سر سلامت پاتې وي د افغانستان سر به سلامت وي.
طالبان د داسې ننګینو معاهدو تاریخ نه لري او نه یې د شرم داسې کوم تاریخ پریښی دی چې له امله یې افغانان سرټيټي شي.
له غرب څخه د راغلو شریرو عناصرو ژوند او سیاست په ننګینو معاهدو او تړونونو ولاړ وو؛ په افغاني، اسلامي او پښتني روایتو یې سودا وکړه؛ په دومره لویو جنګونو کې یې نه خپل نوک ژوبل کړ او نه یې د اولادونو پوزه وینې شوه، بس د مظلوم ملت په وینو یې ډالري اکاونټونه وپړسول له وطنه یې فرار ته ترجیح ورکړه.