د پرځېدلي جمهوریت د ملي امنیت د بدنامې او جنایتکارې ادارې مشر، د سي آی اې جاسوس او د خيالي مقاومت په نوم ډلې د رهبرۍ غړي امرالله صالح چې د تاجکستان په پلازمېنه دوشنبه کې مېشت دی؛ په افغانستان کې د جګړې د اور بلېدلو لپاره د خلکو هڅونې او تېر ایستنې هڅې کوي.
تازه هندوکش غږ د امرالله صالح هغه شوم پلانونه افشاء کړي، چې غواړي دیني عالمان، قومي مخور، د داخلي او بهرنیو مؤسساتو کارکوونکي او مدرسې په نښه کړي. که څه هم نوموړی او د هغه په څېر نور شریر عناصر د دې وس او توان نه لري چې له هېواد بهر دا ډول شوم پلانونه عملي کړي، خو دغه پلانونه د نوموړي مرموزه څهره، شوم پلانونه او په ولس کې د وېرې خپرولو موخې په ډاګه کوي.
امرالله صالح چې خلک یې د یوې مرموزې، استخباراتي او جاسوسې څهرې په توګه هم پېژني، د پرځېدلې جمهوریت پر مهال یې پر بېلابیلو موقفونو کار وکړ، تل یې د عامو افغانانو د وژنې، ډار او وېرې خپرولو، پر ملکي اهدافو او عامه ځایونو د بریدونو، د علماوو او قومي مشرانو د هدفي وژنو او همدا راز د ده تر لاس لاندې زندانونو کې د سختو او بشر ضد شکنجو او ربړونو چارې پر مخ وړلې، د خپلو جنایتونو له امله مشهور شوی او له عامو وګړو سره یې د جنایاتو زرګونه نمونې شته.
کله چې د ملي امنیت په نوم د بدنامي ادارې مشر و، زرګونه عام او بې ګناه افغانان یې په یوه او بل نوم په زندانونو کې اچول، سختې شکنجې یې ورکولې، ځینې خو یې ترې تم کول هم او ځینو نورو تر سختو شکنجو لاندې ساه ورکول. د دې ترڅنګ یې په کلیو او بانډونو کې له امریکايي او نورو بهرنیو اشغالګرو ځواکونو سره اوږه پر اوږه ستر جنایتونه وکړل، اشغالګرو د ده په غوښتنه او اطلاعاتو ودونه، جنازې او نورې عامې ولسي غونډې بمبارد کړې، جوماتونه، ښوونځي او مدرسې یې پرې ورانې کړې او ګڼ شمېر نور جنایتونه یې هم وکړل.
تر دې ورهاخوا پرځېدلي جمهوریت په وروستیو کې، کله چې لومړی مرستیال شو، بیا یې د بهرنیو استخباراتي ادارو په مټ د دیني علماوو، مخورو، قومي مشرانو، خبریالانو او نورو نوموتو کسانو د وژنې او ترور لړۍ روانه کړه، خو پړه به یې پر طالبانو اچول. همدا راز د تېرې استخباراتي ادارې د معلوماتو له مخې د داعش تر نوم او عنوان لاندې پر کابل پوهنتون برید، پر روغتونونو او نورو عامه ځایونو بریدونه هم نوموړي پلان کړي وو. پر دې شومو کارنامو سربېره، امرالله صالح په افغانستان کې د مېشتو قومونو او پرګنو ترمنځ بې اتفاقیو او تفرقو ته هم پراخه لمن ووهل. اوس چې له هېواده تښتېدلی، بیا هم د ولس او عامو افغانانو په وینو نه دی موړ او لاهم د دوی د وینې بهونې او وژلو شوم پلانونه په پام کې لري.
پر دیني عالمانو، قومي مشرانو، مخورو، ګذر وکیلانو، د ولس پر استازو، د مؤسساتو پر کارکوونکو او مدارسو د بریدونو پلانونه که څه هم ممکن نه دي، خو د افغانستان، افغان ولس او ملکي اهدافو په اړه د امرالله صالح، د هغه د همفکرانو، د دوی په نوم جوړو شویو ادرسونو، جبهو او ډلو شومې موخې یې په ډاګه کړې، دا یې بیا ثابته کړه چې له ولس سره د دوی تلپاتې دښمني پای ته نه ده رسېدلې.