د اتریش په پلازمېنه ویانا کې د ازمویل شویو څهرو په پنځمه دوره ناسته کې ناکام شعارونه ورکول شول او د راتلونکې په اړه د ځینو څهرو له خوا ناسم انتخاب وشو؛ په دغه تبلیغاتي ناسته کې بیا هم له سرپرست حکومت سره د سولې په ځای، د جګړې د دوام شعارونه بدرګه شول.
د آزادۍ جبهې مشر یاسین ضیاء چې د افغانستان د تېر حکومت په پوځ کې یوه ازمویل شوې او ناکامه څهره ده، د ویانا ناستې په څنډه کې یې د سرپرست حکومت پر چارواکو د بندیزونو د لګولو ترڅنګ، د جګړې د دوام شعارونه ورکړل او پر ځینو هغه څهرو چې په همدې ناسته کې یې هم ګډون درلود، د نوم له اخیستلو پرته مخاطب کړل او زیاته یې کړه، چې ځینې څهرې له طالبانو سره د سولې په اړه ناستو باندې د جګړې مشروعیت زیانمنوي.
یاسین ضیاء په خپلو څرګندونو کې د سرپرست حکومت د مخالفو ډلو ترمنځ پر سیاسي یووالي هم ټینګار کړی او د خپلو خبرو په دوام کې یې ویلي، چې د هیڅ هېواد له ملاتړ پرته به بیا هم جګړه دوام مومي. په داسې حال کې چې د طالبانو مخالفیو سیاسي او نظامي ډلو څو ځله د اتحاد رامنځ ته کولو لپاره هڅې کړي، خو ټولې هڅې یې ناکامې وې.
بهر مېشتې ډلې ټپلې له هرې یوې انلاین او حضوري ناستې وروسته د یو نوي ائتلاف په اړه صلاح شوي، خو له جوړېدو وروسته د شدیدو خپل منځي اختلافاتو له امله بیرته پاشل شوي، هر یوه یې جدا مسیر انتخاب کړی او هر چا د خپلو ګټو لپاره بېلابیلې ډلې جوړې کړې دي.
د ویانا ناسته هم د تېر په څېر د ازمویل شویو، تکراري او شړېدلو څهرو ناکامه راټولېدنه ده، په دغه ناسته کې د پخوا په څېر تبلیغاتي څرګندونې وشوې، د سولې په ځای د جګړې ناسم انتخاب وشو، هغه ناکام او نا مشروع شعارونه بدرګه شول، چې لسیزې یې هېواد له بدبختیو سره مخ کړی و.
د ویانا ناستې ټوله تبلیغاتي بڼه د ګډونوالو له څرګندونو هم ښکاره شوه، دوی د افغانستان د قضایاوو په اړه د بنسټیز بحث په ځای، هغه تکراري څرګندونې وکړې او هغه ناسم شعارونه یې ورکړل، چې ولس یې له امله لسیزې ځورېدلی او اوس پکې د دغه شعارونو بدرګه کوونکي هم منفور شوي دي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.