د ټولگټو چارسمبالي وزیر ملا محمد عیسی ثاني د کابل ـ کندهار د لویې لارې د رغنیزو چارو څخه لیدنه کړې او تړون لرونکو شرکتونو ته یې سپارښته کړې، چې د یادې لویې لارې رغنیزې چارې دې په غوره کیفیت تر سره کړي.
له یاد وزارت څخه په خپره شوې خبرپاڼه کې ویل شوي، د کابل ـ کندهار لویې لارې په اوږدو کې ۶ محرابه مجسدونه جوړېږي، چې د ۵ محرابه مسجدونو ودانیزې چارې یې سږ کال پیل شوې او د یو محراب مسجد د رغونې کار په دامان ولسوالۍ کې پرو سږکال پیل شوی و، چې ۶۰ سلنه چارې یې مخته تللې دي.
د خبرپاڼې له مخې، نوموړي د وزارت او تړون لرونکو شرکتونو له اړونند ماشینریو، کمپونو، کرش پلانټونو، قیر پلانټونو او کارخونو څخه هم لیدنه کړې او د تړون لرونکو شرکتونو مسوولینو، تخنیکي او کاري ډلو ته یې لارښوونه کړې، چې خپلې ور سپارل شوې چارې دې په غوره کیفیت، چټکتیا او ټاکلي وخت تر سره کړي.: «همدارنگه د ټولگټو وزارت چارسمبالي وزير د کابل-کندهار د لويې لارې په اوږدو کې له نصب شوو تلو څخه هم ليدنه وکړه او اړونده مسوولينو ته يې د باروړونکو وسايطو د جدي څارنې لارښوونه وکړه ؛ ترڅو د يادې لويې لارې رغول شوو برخو د ويجاړېدو څخه مخنيوی وشي.»
د کابل-کندهار لویه لار چې د افغانستان تر ټولو مهم اقتصادي رگ بلل کېږي، ۴۵۰ کیلومټره اوږدوالی لري.
ټولگټو وزارت پرو سږکال د يادې لویې لارې کار په ۷ برخو کې پيل کړی وو، چې اوس يې د کار د چټکتيا او غوره تطبيق په موخه په بېلابېلو نورو برخو وېشلی دی.
د کابل – کندهار لويه لار د هېواد يوه له مهمو اقتصادي لویو لاروو څخه ده، چې گاونډيو هېوادونو ته د کرنيزو او سوداگريزو توکو په لېږد رالېږد کې غوره اقتصادي رول لري او په اساسي ترميم او بیا رغونې سره به یې د کرنيزو او سوداگريزو توکو په چټک لېږد رالېږد کې د پام وړ اسانتياوې رامنځ ته شي.