د پانگونې بین الوزارتي کمېټه وايي، په نننۍ ناسته کې یې د لمریزې او بادي برېښنا د تولید، سوداگریزو مرکزونو او کرنیزو کمپلېکسونو د جوړولو طرحو په اړه بحث کړی دی.
له اقتصادي معاونیت څخه په خپره شوې خبرپاڼه کې ویل شوي، د خصوصي سکټور له لوري په هرات کې د ۵۰ مېگاواټه بادي برېښنا، په بلخ کې د ۴۰ مېگاواټه لمریزې برېښنا، د غزني په مرکز کې تر ځمکه لاندې د سوداگریز مارکېټ جوړولو، د هېواد په پینځو زونونو کې د کرنیزو کمپلېکسونو رامنځته کولو او همدارنگه په کابل ښار کې د سوداگریز مارکېټ جوړولو طرحو په اړه هراړخیز بحث وشو.:« له مفصلو بحثونو وروسته ټاکل شوو کمېټو ته دندې وسپارل شوې، څو د پانگونې بینالوزارتي کمېټې د نظرونو په پام کې نیولو سره د طرحو له وړاندې کوونکو شرکتونو سره د یادو طرحو د مالي، تخنیکي او اقتصادي اړخونو د ارزونې په موخه گډ مجلسونه وکړي او خپل راپورونه په ټاکلي وخت د پانگونې بینالوزارتي کمېټې ته وړاندې کړي.»
اوسمهال په هېواد کې گڼ رغنیزې پروژې د یادې کمېټې له لوري د پیلېدو په حال کې دي او په ځینو پروژو بحثونه روان دي، چې په راتلونکي کې به یې چارې پیل شي.