د پاکستان د پوځ دننه حاکمه شریره کړۍ چې له اوږدې مودې راهیسې یې دغه هېواد د بحران پر پوله درولی، تازه یې د افغانستان لپاره دام اېښی و، خو اوس دوی په خپله په دغه دام کې را ګېر دي. دې کړۍ په یوه پاروونکي او ناسجیده ګام کې پر افغان خاوره برید وکړ، وروسته له داسې ځوابي برید سره مخ شول چې له کنټرول یې وتلی و.
د افغان پوځ په لومړني ځوابي برید کې د دوی لسګونه عسکر قتل، ګڼې پوستې یې د اور خوراک او په زیاته اندازه پوځي وسایط او اسلحې ترې غنیمت شوې او له وارخطايۍ یې له سعودي او قطر هېوادونو د منځګړیتوب غوښتنه وکړه، که څه هم لومړی ځوابي برید د منځګړو په غوښتنه ودرول شو، خو دې شریرې کړۍ غوښتل له وضعیت ګټه پورته کړي او بېرته ځانونه بل برید ته چمتو کړي، چې تر دې کار وړاندې تېره ورځ د افغان پوځ له زړور او پر وخت غبرګون سره مخ شول.
په پروني برید کې هم پاکستاني پوځ ډېر شمېر عسکر له لاسه ورکړل، پوستې یې پرېښودې او له لېرې ځایونو یې پر ملکي اهدافو توغندۍ واورولې. افغان اړخ ته ټول دیني عالمان، ولس او خلک د خپل پوځ تر شا ولاړ دي او پوځ یې په پوره مېړانه د دښمن مقابله وکړل، خو پاکستاني اړخ ته علماء، عام ولس او آن سیاستوال یې چوپه خوله دي او د پاکستاني پوځ د ماتې او شرارتونو ننداره کوي. مګر بالاخره دا ماتې پرون ماښام ومنل شوه او د اوربند غوښتنه یې کول.
پر افغان خاوره برید د پاکستان د پوځ دننه یوې وړې، شریرې، اجیرې، خو حاکمې کړۍ پیل کړی و او ټوله پړه یې هم د هغوی په غاړه ده. دوی پاکستاني ولس، علماء او سیاسیون یرغمل کړي او په خپل پوځ او پولیسو کې پردي زامن د خپلو ګټو قرباني کوي. که پاکستاني ولس، علماء او سیاسیون د دغه کار مخه و نه نیسي، ښايي ژر به د دغه هېواد دننه وضعیت له کنټرول ووځي او یوه غیر متوقع حالت به صورت ومومي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.