د پاکستان د طالبانو غورځنګ په يوه خبرپاڼه کې ويلي، چې د دوی پر وړاندې د پاکستان د استخباراتي ادارو د شومو پلانونو او دسیسو لړۍ لا هم روانه ده او تازه د پاکستان د استخباراتي ادارو لخوا یو امنیتي ګواښ خپور شوی چې په پکې ویل شوي، د پاکستاني طالبانو د هدفي بریدونو یوه قطعه د شیخ امین الله په ګډون د یو شمېر نورو اشخاصو د ترور لپاره ښار ته داخله شوې ده.
خبرپاڼه کې پاکستاني طالبان وايي، دوی په وار وار دا روښانه کړې چې د دوی اهداف او موخې یوازې او یوازې امنیتي ادارې او د دوی همکاران او لاسپوڅي دي، د سیاسي او مذهبي ګوندونو په نښه کول یې په موخو کې هیڅ ځای نه لري.
د سرچينې په وينا، د پاکستان همدې استخباراتي ادارو د اوږدې مودې راهیسې له بېلابېلو لارو د علماوو د ترور لړۍ روانه ساتلې چې یواځینی هدف او ناکامه هڅه یې د خپلو ناوړه موخو ترلاسه کول دي.
په خبرپاڼه کې همدا راز راغلي، «تحریک طالبان پاکستان د علماء کرامو قتل د مسلمه امت لپاره یوه ستره ضایع بولي، او خپل دا مقدس جهاد یې هم د علماء کرامو د خونديتوب او د اسلامي نظام د نفاذ په خاطر روان ساتلی دی».
ياده دې وي پاکستاني حکومت په ځينو ښارونو کې امنيتي ګواښونه خپاره کړي، چې ګواکې پاکستاني طالبان غواړي مشهور ديني عالم شيخ امين الله ترور کړي.