د پاکستان د طالبانو غورځنګ په خپلو رسنيزو ادرسونو د پاکستان شته سياسي ګوندونو په ځانګړي ډول د پاکستان مسلم ليګ ګوند ته په يوه اعلاميه کې اخطار ورکړی چې د دوی پر وړاندې دې د پاکستان د حکومت ژبه نه کاروي کنه د دوی مشران او غړي به خپله موخه وګرځوي.
په اعلاميه کې پاکستاني طالبانو ويلي چې زمونږ اهداف د پاکستان امنيتي ادارې دي نه سياسي ګوندونه او زياته کړې یې ده «د موجوده حکومتي اتحاد، په ځانګړې توګه د پاکستان مسلم لیګ رهبري، په خپلو بیانیو کې زمونږ په اړه بار بار هغه ژبه کارولې چې پاکستاني پوځ يې زمونږ په خلاف استعمالوي، له همدې امله، مونږ دغه سیاسي ګوندونو په ځانګړي ډول مسلم ليګ ته اخطار ورکوو چې د ښکېلاکګر پوځ او امنیتي ادارو ترمنځ په روانه جګړه کې د فریق په توګه ونه درېږي، ګنې مونږ به مجبوراً د مسلم لیګ رهبري او د دوی په څېر نور فساد جوړونکي او شريعت دښمنه عناصر خپل هدف وګرځوو».
د يادونې وړ ده چې پاکستاني طالبانو تل ټينګار کړی چې د دوی اهداف امنيتي او پوځي ادارې دي، سياسي ګوندونه او اشخاص دې د دوی پر وړاندې دريځ نه نيسي کنه بيا به یې خپل هدف وګرځوي.