لیکوال: عمران آغا
د یوه هېواد سیاسي ثبات د سیمې او نړۍ په کچه هغه وخت رامنځ ته کیږي چې قوي مرکزي حاکمیت شتون ولري، دا حاکمیت پر ملت په جبر او زور نه وي تپل شوی، بلکې حاکمیت او سلطه د یوه ملت د هیلو ثمره او آینده وي، د دې ترڅنګ د یوه هېواد د سیاسي ثبات لپاره قوي اقتصاد هم د ملا د تیر حیثیت لري.
په دې وروستیو کې د پاکستان تر حاکمیت لاندې د آزاد کشمیر په مرکز مظفر آباد او میرپور سیمو کې د ځایي خلکو او پولیسو ترمابین د بريښنیایي لګښتوتو او غنمو د لوړې بیې پخاطر نښتې شوي چې مرګ ژوبلې هم لري.
د آزاد کشمیر سیمه چې د پاکستان تر حاکمیت لاندې ده، اولس یې له زیاتو کړاونو سره لاس او ګرېوان دی، د پاکستان لخوا ورته هیڅ توجه نه کیږي خو د دې برعکس وخت ناوخت ځورول کیږي.
د جغرافیوي موقعیت له مخې د آزاد کشمیر سیمه د پرېمانه اوبو څخه برخمنه ده چې د برېښنا د تولید پراخ ظرفیت هم لري، د دې ترڅنګ د کشمیر یو له مهمو حاصلاتو څخه غنم حسابیږي.
د پاکستان دولت د دې پر ځای چې د کشمیر له خپلو اوبو څخه د کشمیر اولس ته برېښنایي خدمات او د کشمیر مهم حاصلات ( غنم) په ارزانه بیو وړاندې کړي، برعکس د برېښنايي خدماتو بیې لوړې او غنم تر احتکار وروسته قیمته پلوري.
د پاکستان دولت په دې ورستیو کلونو کې د پیسو نړیوال صندوق (IMF)، چین او عربي متحده امارتو څخه په میلیاردونو قرضدار دی، سیاسي ثبات یې هم ورځ تر بلې خرابیږي، ګوندونه ورځ تر بلې د حکومت څخه سرغړونه کوي تر ټولو ښه نمونه یې د عمران خان پلویان دي.
آزاد کشمیر د پاکستان له لوري په جبر او زور نیول شوی دی، د پاکستان له دولت څخه کاملا ناراضه دي، د ژوند ابتدائي سهولتونه حتی نه دي ورته برابر شوي، د دولت او اولس تر مابین کله ناکله حتی مسلح برخورد هم کیږي او دا مبارزه به یې لا دوام لري.
د یادونې وړ ده چې د کشمیر عمومي جغرافیه له ۱۹۴۷ ھ ق کال او هند تر استقلال وروسته په لاندې برخو وویشل شوه:آزاد کشمیر د پاکستان تر حاکمیت لاندې، د اقصی چین په نامه سیمه د چین تر حاکمیت لاندې، د جامو او کشمیر په نوم سیمه د هند تر حاکمیت لاندې.