د پرځېدلي جمهوريت پر مهال پاکستان کې د افغانستان سفير او د کرکټ بورډ پخوانی رئيس عاطف مشعل وايي، د امريکا له لوري د خليفه سراج الدين حقاني په سر د ایښودل شوې جائزې باطل اعلانول يو لوی سياسي پيغام لري، او په وينا یې دا ښکاره کوي چې افغانستان او امریکا يوه تعامل ته نژدې شوي او د دواړو هېوادونو ترمنځ دغه تعامل نه یوازې دوه اړخیز ارزښت لري، بلکې پراخ نړیوال او سیمه ییز اهمیت هم لري.
نوموړی وايي دا پرمختګ غربي نړۍ ته دا پیغام ورکوي، چې د افغانستان د منزوي کولو سیاست ناکام شوی، اوس د فشار او یو اړخیزو دریځونو وخت پای ته رسېدلی، او د نړۍ هېوادونه باید د تعامل، تفاهم او مذاکراتو له لارې د ستونزو حل ته لاره ومومي.
مشعل همدا راز زياته کړې، چې د امريکا له دې ګام وروسته بايد د سيمې هېوادونه په دې پوه شي چې له افغانستان سره د دوی نه تعامل او نه رسميت پېژندنه مضر احتياط او د دوی په تاوان ده، او د نوموړي په وينا د سيمې او د افغانستان ګاونډي هېوادونه بايد فرصت له لاسه ورنه کړي او له سرپرست حکومت سره خپلې اړيکې لا پراخې کړي.
ياده دې وي چې پرون د امريکا له لوري د افغانستان د کورنيو چارو په سرپرست وزير خليفه سراج الدين حقاني، عبدالعزيز حقاني او يحيی حقاني ایښودل شوې لسګونه ميليونه ډالره جائزې باطلې اعلان کړې.