د پکتيا ولایتي چارواکو په ګردېز ښار کې په ۲۵ جريبه ځمکه کې د یو ۱۵۰ بستريز روغتو د جوړېدو د چارو د پیل خبر ورکړی. د دغه روغتون د جوړېدو پروژه د کورنیو چارو د سرپرست وزیر خلیفه سراج الدین حقاني له خوا وړاندیز شوې او د متحده عربي اماراتو لهخوا د پنځه میلیونه ډالرو په لګښت جوړېږي.
د پکتيا د عامې روغتيا رئيس معراج ګل عادل ويلي: “د ١٥٠ بسترونو په ظرفيت دغه روغتون په ٢٥ جريبه ځمکه کې د پنځه ميليونه ډالرو په لګښت په معیاري ډول جوړېږي.”
همداراز د کورنیو چارو وزارت د سرحدي پولیسو عمومي رئیس محمد شریف منګل ویلي: «د دغه روغتون دروازې به نه یواځې د دې زون بلکې د سیمې د ټولو مسلمانو پر مخ خلاصې وي. دغه روغتون د متحده عربي اماراتو په مالي مرسته او د کورنیو چارو د وزیر خلیفه صاحب په ځانګړي امر جوړیږي.»
د پکتيا اوسېدونکي د دغه اقدام هرکلی کړی او په دغه ولايت کې د روغتيايي سکتور د لا پياوړتيا غوښتنه کوي.
د پکتيا چارواکي وايي، ډېر ژر به د دغه ولايت په يو شمېر سيمو کې د ۱۲ نویو روغتيايي مرکزونو د جوړېدو چارې پيل شي.