د افغانستان د سرپرست حکومت د ټولګټو چارو وزارت سرپرست ملا محمد عیسی ثاني په کابل کې د چین له سفیر ژاو شینګ سره په کتنه کې پر یو شمېر مهمو موضوعاتو خبرې کړي.
یاد وزارت په یوه خبرپاڼه کې ویلي، چې دواړو لوریو د واخان دهلېز په اړه چې افغانستان له چین سره نښلوي هر اړخیزې خبرې کړي. د ټولګټو وزارت سرپرست ویلي، چې د واخان دهلېز د سړک د سروې چارې د ټولګټو وزارت له لوري بشپړې شوي او د ډیزاین چارې یې دامهال جریان لري.
د خبرپاڼې له مخې، په دغه کتنه کې د افغان ټرانس پروژې په اړه چې د مرکزي اسیا هېوادونه د افغانستان له لارې له جنوبي اسیا هېوادونو سره نښلوي هم خبرې اترې ترسره شوې. ښاغلي ثاني ویلي چې په دې اړه د سرپرست حکومت د رهبرۍ په سطحه مذاکرات له یادو هېوادونو سره ترسره شوي او لا هم دوام لري. همداراز ښاغلي ثاني ټینګار کړی، چې د ټولګټو چارو وزارت د یادې پروژې پیلولو ته بشپړ چمتووالی لري.
په پای کې دواړو لوریو د افغانستان او چین ترمنځ د دوامداره اقتصادي اړیکو، سوداګریزې راکړې ورکړې او د بنسټیزو پروژو په برخه کې پر همکارۍ ټینګار کړی.